រថយន្តសាំយ៉ុងបុកក្បាលនាគពុះចែកទ្រូងផ្លូវដាច់មួយកង់ រថយន្តបើកទៅមុខលែងរួច

ភ្នំពេញ៖ រថយន្តឈ្នួលដឹកអ្នកដំណើរបើកលឿនជ្រុលចង្កូតទៅបុកក្បាលនាគពុះចែកទ្រូងផ្លូវដាច់មួយកង់ ចំណែកឯរថយន្តបើកទៅមុខលែងរួច ។

ហេតុការណ៍នេះ បានកើតឡើងកាលពីម៉ោងរំលងអធ្រាត្រ ឈានចូលថ្ងៃទី៧ ខែតុលា ឆ្នាំ២០១៩ នៅតាមបណ្ដោយផ្លូវលេខ ២១៧ សង្កាត់វាលវង់ ខណ្ឌ៧មករា រាជធានីភ្នំពេញ ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តសាំយ៉ុង ពណ៌ស មួយគ្រឿងពាក់ស្លាកលេខ កណ្ដាល 2C-2565 បើកបរដោយបុរសម្នាក់តាមបណ្ដោយផ្លូវលេខ ២១៧ ក្នុងទិសដៅពីកើតទៅលិចយ៉ាងលឿន ខណៈមកដល់កន្លែងកើតហេតុបានជ្រុលចង្កូតបុកក្បាលនាគពុះចែកទ្រូងផ្លូវនៅខាងមុខធនាគារអេស៊ីលីដា បណ្ដាលឲ្យដាច់មួយ កង់ ហើយនៅក្នុងហេតុការណ៍គ្រោះថ្នាក់ចរាចរនេះក៏មិនបង្កឲ្យមានអ្នករងរបួសនោះទេ ។

បន្ទាប់ពីកើតហេតុសម្ថកិច្ចមូលដ្ឋានបានចុះមកដល់កន្លែងកើតហេតុទាក់ទងទៅសម្ថកិច្ចជំនាញចរាចរចុះមកយករថនយ្តបង្កទៅរក្សាទុកនៅការិយាល័យផ្លូវគោករាជធានីភ្នំពេញរង់ចាំការដោះស្រាយគ្នានៅពេលក្រោយ ៕ ជ្រោយពេជ្រ