សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន ៖ ប្រជាពលរដ្ឋបានធ្វើការរិះគន់មន្ត្រីសាខាពន្ធដារខេត្តប៉ៃលិន ថាមិនយកលុយខ្មែរ ដែលចាស់របស់គាត់ ស្របពេលដែលគាត់យកលុយខ្មែរ ដែលរាងចាស់បន្តិចទៅបង់ពន្ធរថយន្តរបស់ខ្លួន ហើយបែរជាមន្ត្រីសាខាពន្ធដារខេត្ត មិនព្រមយក ដោយនិយាយថា ខាងធនាគារកាត់ទឹក។ នេះបើតាមយោងតាមគណនីហ្វេសប៊ុករបស់ ឈ្មោះ Sar sambo ដែលបានចេញផ្សាយ កាលពីថ្ងៃទី៤ ខែតុលា ឆ្នាំ២០១៩ កន្លងទៅ ។
ម្ចាស់អាក់ខោន លោក សរ សំបូរ រស់នៅភូមិអូរច្រាលើ សង្កាត់ទូលល្វា ក្រុងប៉ៃលិន ជាម្ចាស់គណនីFBខាងលើ បានឲ្យថា ៖ កាលពីថ្ងៃទី០៤ ខែតុលា ឆ្នាំ២០១៩កន្លងទៅ លោកបានទៅបង់ពន្ធរថយន្តរបស់ខ្លួននៅសាខាពន្ធដារខេត្តប៉ៃលិន ដោយមានប្រជាពលរដ្ឋមួយចំនួន មន្ត្រីធនាគារអេស៊ីលីដាចំនួន០២នាក់ និងមន្ត្រីពន្ធដារខេត្ត ដែលប្រចាំចំនួន០៥នាក់ នៅជាមួយគាត់ដែរ។ ខណៈពេលយកលុយទៅបង់ពន្ធក្នុងបន្ទប់ធ្វើការរបស់មន្ត្រីពន្ធដារទាំងនោះ មានមន្ត្រីពន្ធដារម្នាក់ ដែលជាស្ត្រី មិនព្រមទទួលយកលុយរបស់គាត់ឡើយ ពេលនោះរូបគាត់ក៏បានសួរនាំថា ហេតុអ្វីមិនព្រមទទួលយកលុយរបស់គាត់ បែរជាមន្ត្រីពន្ធដារនោះនិយាយថា លុយចាស់សុំឲ្យដូរចេញ ព្រោះខាងធនាគារមិនយកទេ គេកាត់ទឹក។
គាត់បានបញ្ជាក់ថា រូបគាត់មិនស្គាល់ឈ្មោះមន្ត្រីនោះទេ ព្រោះគេធ្វើការក្នុងបន្ទប់ទូ កញ្ចក់ តែ ដោយមិនចង់មានរឿងវែងឆ្ងាយ គាត់ក៏ព្រមដូរលុយថ្មីឲ្យវិញ ព្រោះរវល់ការងារចម្ការ ហើយក៏ត្រឡប់មកផ្ទះវិញតែម្តង។
ពាក់ព័ន្ធបញ្ហាខាងលើនេះ ត្រូវបាន លោក ផាវ ឌីណូរិន ប្រធានសាខាពន្ធដារខេត្តប៉ៃលិន បានបញ្ជាក់ប្រាប់ តាមប្រព័ន្ធTelegram នៅវេលាម៉ោង១១និង៥០នាទីព្រឹក ថ្ងៃទី៨ ខែតុលា ឆ្នាំ២០១៩នេះថា លោកទើបទទួលបានព័ត៌មានកាលពីព្រឹកមិញដែរទេ រួចក៏រាយការណ៍ទៅអភិបាលខេត្តប៉ៃលិន និងប្រធានក្រុមប្រឹក្សាខេត្ត រួចរាល់ហើយដែរ ចំពោះបញ្ហានេះគឺវាមិនពិតដូចគណនីFBខាងលើ បានបង្ហោះនោះទេ។ នៅថ្ងៃនោះ ម្ចាស់គណនីខាងលើ បានយកលុយមកបង់ពន្ធមែន ដោយមានក្រដាសប្រាក់២ម៉ឺនរៀល ដែលរហែកចំនួន០៥សន្លឹក ស្មើ១០ម៉ឺនរៀល មិនមែនជាក្រដាសប្រាក់ដែលខាងគណនីFB បានបង្ហោះនោះទេ។ ចំណែកពាក់ព័ន្ធការកាត់លុយ ក៏មិនមានដែរ លោកបានសួរនាំមន្ត្រីរបស់លោករួចរាល់ហើយ ដូច្នោះការបង្ហោះរបស់គណនីហ្វេសប៊ុកខាងលើ វាមិនពិតទាំងអស់។
លោកក៏បានបញ្ជាក់ដែរថា ខាងលោកនេះបានបង្ហោះបកស្រាយ តាមគណនីហ្វេសបុករបស់សាខាពន្ធដារខេត្តតបវិញ ព្រោះវាពាក់ព័ន្ធបញ្ហាធំដល់ស្ថាប័នរបស់លោក ុំ
ចំពោះការបកស្រាយរបស់លោកប្រធានសាខាពន្ធដារខេត្តប៉ៃលិនខាងលើនេះ គេមិនដឹងថា លោកបានស្រាវជ្រាវច្បាស់ដែរឬទេ ខណៈគេសង្ស័យថាកូនចៅរបស់លោកឆ្លើយបញ្ជាក់ដើម្បីយករួចខ្លួននោះ ៕ ប្រាថ្នា
