សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ក្រុមការងារ អគ្គលេខាធិការ អាជ្ញាធរជាតិទប់ស្កាត់អាវុធគីមីនុយក្លេអ៊ែរ ជីវសាស្ត្រ និងវិទ្យុសកម្ម ក្រសួងការពារជាតិ បានចូលរួមបេសកកម្មជាមួយក្រុមការងារជំនាញ CBRN អឺរ៉ុប និងអាមេរិក សហការជាមួយក្រុមការងារជំនាញអាជ្ញាធរជាតិអាវុធគីមី ចុះរុករកសារធាតុគីមីដោយប្រើប្រាស់ម៉ាស៊ីន URAID នៅទីតាំងដែលបានកំណត់នៅក្នុងឃុំគគីរ ស្រុករមាសហែក ខេត្តស្វាយរៀង នៅថ្ងៃទី១៧ខែតុលាឆ្នាំ២០១៩។
ប្រភពពីមន្ត្រីលេខាធិការ អាជ្ញាធរជាតិទប់ស្កាត់អាវុធគីមីនុយក្លេអ៊ែរ ជីវសាស្ត្រ និងវិទ្យុសកម្ម ក្រសួងការពារជាតិ បានអោយដឹងថា ជាលទ្ធផលនៃបេសកកម្មរបស់ក្រុមការងារគឺបាបានរកឃើញថា វាជាសារធាតុ CS (ជាប្រភេទម្សៅគីមី នៅពេលបំផ្ទុះវាសាយភាយចេញជា Gas វាធ្វើឲ្យស្រវាំងភ្នែក ប៉ះពាល់ដល់ផ្លូវដង្ហើម និងសរីរាង្គកាយ)។
គួររំលឹកផងដែរថាៈ កាលពីចុង ខែកក្កដា ឆ្នាំ២០១៩នេះ ក៏មានការផ្សព្វផ្សាយច្បាប់ស្តីពីការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម នៅសាលប្រជុំ សាលាខេត្តស្វាយរៀង ដែលរៀបចំឡើងដោយអគ្គនាយកដ្ឋាន អាជ្ញាធរជាតិអាវុធគីមីផងដែរ ដែលកិច្ចប្រជុំនេះ ផ្តោតទៅលើ វិទ្យាសាស្ត្រលើពិភពលោកនាពេលបច្ចុប្បន្ន ដែលកំពុងរត់ប្រណាំងគ្នា ជាពិសេស ប្រទេសមហាអំណាចធំៗ ទាំង៥កំពុងដណ្តើមគ្នាយកលេខមួយខាងផ្នែកសេដ្ឋកិច្ច ហើយគ្រឿងសព្វាវុធប្រល័យ លោកក៏កំពុងតែផលិតឡើងលើប្រទេសមហាអំណាចទាំងនោះ ដើម្បីត្រៀមធ្វើសង្គ្រាមដណ្តើមអំណាចគ្រប់គ្រងពិភពលោកទាំងមូល ។
អាវុធគីមី នុយក្លេអ៊ែរ អាវុធជីវសាស្ត្រ អាវុធវិទ្យុសកម្ម និងសារធាតុគីមី ក៏បានរាលដាលពាសពេញពិភពលោក ហើយបន្ទាប់ពីសម្លាប់មនុស្សដោយផ្ទាល់ គឺសម្លាប់មនុស្សដោយប្រយោល ជាពិសេសគឺបង្កឲ្យកើតមានជំងឺផ្សេងៗ និងគ្រោះថ្នាក់ដល់មនុស្ស សត្វ រុក្ខជាតិ ជាបន្តបន្ទាប់ផងដែរ ។ល។
ច្បាប់ ស្តីពី ការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម របស់ព្រះរាជាណាចក្រកម្ពុជា ត្រូវបានដាក់ឲ្យប្រើប្រាស់ និងផ្សព្វវផ្សាយទូលំទូលាយ ដល់ស្រទាប់ប្រជាពលរដ្ឋមូលដ្ឋាន ចូលរួមទប់ស្កាត់ឲ្យមានប្រសិទ្ធភាព ដើម្បីសុខភាព និងអាយុជីវិតយើងទាំងអស់គ្នា ៕ យឹម សុថាន
