ផឹកស្រាស្រវឹង ពុំដឹងមានមូលហេតុអ្វី លោតទឹកទន្លេបាសាក់សម្លាប់ខ្លួនស្លាប់បានសម្រេច

ខេត្តកណ្តាល៖ បុរសដែលតែងតែផឹកស្រាជាប្រចាំម្នាក់ ពុំដឹងជាមានមូលហេតុអ្វី ខណៈផឹកស្រាស្រវឹង បានលោតទឹកទន្លេបាសាក់សម្លាប់ខ្លួន បណ្ដាលឲ្យស្លាប់ បង្កការភ្ញាក់ផ្អើលឡើងនៅថ្ងៃទី២០ ខែតុលា វេលាម៉ោង១០ និង៣០នាទី នៅចំណុចក្នុងទឹកទន្លេបាសាក់ ស្ថិតក្នុងភូមិព្រែកតាឃិន ឃុំជ្រោយតាកែវ ស្រុកកោះធំ ខេត្តកណ្តាល ។

មន្រ្ដីនគរបាលស្រុកកោះធំបានឲ្យដឹងថា ជនរងគ្រោះឈ្មោះ ពីង អឿន ភេទប្រុស អាយុ៤០ឆ្នាំ មុខរបរ មិនពិត ជាមនុស្សញៀនស្រា វង្វេងស្មារតី មានទីលំនៅភូមិព្រែកតាឃិន ឃុំជ្រោយតាកែវ ស្រុកកោះធំ ខេត្តកណ្តាល ។

ប្រភពដដែលបន្ដថា យោងតាមការសួរបភ្លឺ ឈ្មោះ ពីង ចំរើន ភេទប្រុស អាយុ៣៨ឆ្នាំ ត្រូវជាប្អូនបង្កើតជនរងគ្រោះ និងឈ្មោះ អឿន ស្រីនៀត ត្រូវជាកូនស្រីបង្កើត របស់ជនរងគ្រោះ បានឲ្យដឹងថា៖ ជនរងគ្រោះ ជាមនុស្សញៀនស្រា ផឹកស្រាជាប្រចាំ ហើយវង្វេងស្មារតី ។ លុះនៅយប់ថ្ងៃទី១៨ ខែ តុលា ឆ្នាំ២០១៩វេលាម៉ោងប្រមាណ០២ និង០០នាទី រំលងអធ្រាត្រ ប្រជាពលរដ្ឋឈ្មោះ ភុម ស៊ីម ភេទស្រី អាយុ៣៦ឆ្នាំ មានទីលំនៅៗ ភូមិ ឃុំ ជាមួយគ្នា កំពុងសំរាកនៅផ្ទះរបស់ខ្លួន បានឮុជនរងគ្រោះស្រែកឡូឡាថា៖ អញលោតទឹកៗ ជនរងគ្រោះ ក៏លោតទឹកទន្លេបាសាក់តែម្តង ហើយគាត់ក៏ចេញមកមើលមិនឃើញជនរងគ្រោះ ក៏ទៅប្រាប់ក្រុមគ្រួសារជនរងគ្រោះ ឲ្យបានដឹង ហើយក្រុមគ្រួសារ បានតាមរកជនរងគ្រោះ តែរកមិនឃើញរហូតដល់ថ្ងៃទី២០ ខែតុលា ឆ្នាំ២០១៩ វេលាម៉ោង១០ និង៣០ នាទីទើបរកសាកសពជនរងគ្រោះឃើញអណ្តែតនៅក្នុងទឹកទន្លេបាសាក់ ស្ថិតក្នុងភូមិ ត្រពាំងជ្រៃ ឃុំឈើខ្មៅ ស្រុកកោះធំ រួចបានស្រង់សាកសពយកមកលំនៅឋាន រួចរាយការណ៍ជូនអាជ្ញាធរមូលដ្ឋាន និងសមត្ថកិច្ច ។

បន្ទាប់ពីទទួលបានព័ត៌មានកម្លាំងជំនាញ បានចុះទៅដល់ កន្លែងកើតហេតុ ដើម្បីពិនិត្យសាកសព ។ ក្រោយពីពិនិត្យចប់ សព បានប្រគល់ជូនក្រុមគ្រួសារ ធ្វើបុណ្យតាមប្រពៃណី៕ ស្អាងជ័យ