សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ រ៉ឺម៉កចំនួន០៣គ្រឿងដឹកឈើខុសច្បាប់ត្រូវបានកម្លាំងកងរាជអាវុធហត្ថខេត្តក្រចេះស្ទាក់ចាប់បានហើយប្រគល់ឱ្យរដ្ឋបាលព្រៃឈើ រក្សាទុក។
ការចុះបង្ក្រាបនោះកម្លាំងសមត្ថកិច្ចបានធ្វើឡើងនៅវេលាម៉ោង ០៦.៤៥នាទីព្រឹក ថ្ងៃសុក្រ ១២ រោច ខែ អស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៥ ខែតុលា ឆ្នាំ ២០១៩ នៅចំណុចភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ។
ប្រភពបានឱ្យដឹងថា កម្លាំងបានចុះបង្ក្រាបនោះអនុវត្តតាមបទបញ្ជា លោក ឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្ត ហើយកម្លាំងមូលដ្ឋាន កងរាជអាវុធហត្ថក្រុងក្រចេះដឹកនាំដោយលោក វរសេនីយ៍ត្រី យ៉ុន យូរ៉ា មេបញ្ជាការរង មូលដ្ឋានកងរាជអាវុធហត្ថក្រុង បានចុះបង្រ្កាបផ្ទាល់នៅរ៉ឺម៉កចំនួន៣គ្រឿងដឹកជញ្ជូនផលអនុផលព្រៃឈើដោយគ្មានលិខិតអនុញ្ញាតបានភ្លាមៗតែម្តង ។
ប្រភពបន្តថា ក្នុងការចុះបង្ក្រាបនោះឃាត់បានរ៉ឺម៉កទាំងបីគ្រឿងនោះដឹកឈើចម្រុះប្រភេទកូនក្រឡឹងចំនួន ៦២០ដុំពេលចុះបង្ក្រាបនោះ ម្ចាស់រ៉ឺម៉កបានរត់គេចខ្លួនបាត់ភ្លាមៗផងដែរ។
ក្រោយពេលបង្ក្រាបបានវត្ថុតាងទាំងរ៉ឺម៉ក ទាំងឈើកម្លាំងសមត្ថកិច្ចកងរាជអាវុធហត្ថក៏បានប្រគល់ទៅឱ្យសង្កាត់រដ្ឋបាលព្រៃឈើរក្សាទុកចាត់ការបន្តតាមច្បាប់ព្រៃឈើ ប៉ុន្តែខណៈនោះជំនាញមិនទាន់បាធ្វើការវាស់វែងនៅឡើយ ៕ ជវ័ន្ត
