សារព័ត៌មាន នគរវត្ត តែងតែនាំមុខគេជានិច្ច
បាតុកម្មនៅក្នុងប្រទេសឈីលីបានអូសបន្លាយជាច្រើនថ្ងៃកន្លងមក ហើយប្រែក្លាយទៅជាអំពើហិង្សា បណ្តាលឲ្យមានអ្នកស្លាប់ និងរបួសជាច្រើននាក់ ។
នៅពេលនេះ ប៉ូលិស្រី២នាក់ រងការគប់គ្រាប់បែកសាំងពីបាតុករជ្រុលនិយម ធ្វើឲ្យនាង ត្រូវឆេះខ្លោចពេញខ្លួន បញ្ជូនទៅសង្គ្រោះក្នុងមន្ទីរពេទ្យ។ រូបភាពដែលក្រុមអ្នកយកព័ត៌មានរ៉យទ័រ ថតបានបង្ហាញឲ្យឃើញថា ប៉ូលិសស្រីម្នាក់ត្រូវគ្រាប់បែកសាំងពីក្រុមបាតុករ បណ្តាលឲ្យឆាប់ឆេះឯកសណ្ឋាន រងរបួសជាទម្ងន់។ ហេតុការណ៍កើតឡើង ក្នុងពេលដែលកម្លាំង ប៉ូលិសប្រឆាំងបាតុកម្ម ប្រើប្រាស់ ឧស្ម័នបង្ហូរទឹកភ្នែក និងបាញ់ទឹកទៅលើហ្វូងបាតុករ។
ប៉ូលិសស្រីពីរនាក់ត្រូវគ្រាប់បែកសាំង បណ្តាលឲ្យឆាប់ឆេះ តែត្រូវបានមិត្តរួមក្រុម ជួយទាន់ពេលវេលា ។ ប៉ូលិសស្រីពីរនាក់ដែលរងរបួស ដោយគ្រាប់បែកសាំង មានឈ្មោះ Maria Jose Hernandez Torres អាយុ២៥ឆ្នាំ និងនាង Abigail Catalina Aburto Cardenas អាយុ២០ឆ្នាំ ជាសមាជិកកម្លាំងពិសេស Santiago ។ ប៉ូលិសស្រីទាំងពីររូប រងរបួសជាទម្ងន់ បញ្ជូនទៅសង្គ្រោះនៅក្នុងមន្ទីពេទ្យ ។
រដ្ឋមន្ត្រីក្រសួងមហាផ្ទៃ ឈីលីលោក Gonzalo Blumel បានទៅសួសុខទុក្ខប៉ូលិសស្រីទាំងពីររូប ហើយលោកក៏បានថ្កោលទោស ការវាយប្រហារខាងលើ ពីសំណាក់ក្រុមបាតុករ ទៅលើកម្លាំងប៉ូលិសដែលកំពុងតែបំពេញភារកិច្ច។
បាតុកម្មនៅក្នុងប្រទេសឈីលី នៅមិនទាន់មានសញ្ញាបញ្ចប់នៅឡើយទេ បើទោះបីមានបាតុករជាច្រើន នាក់ត្រូវបានចាប់ខ្លួនក្តី ។ រដ្ឋាភិបាលក៏បានបន្ទន់ឥរិយាបទប៉ុន្តែក្រុមបាតុកម្មនៅតែ បន្តដង្ហែក្បួនប្រឆាំង រដ្ឋាភិបាល ដដែល ៕
