ក្មេងប្រុស២នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងរថយន្តនឹងម៉ូតូ

ខេត្តកំពង់ធំៈ គ្រោះថ្នាក់ចរាចរណ៍រវាងរថយន្ត នឹងម៉ូតូទិសដៅផ្ទុយគ្នាបណ្ដាលអោយក្មេងប្រុស២នាក់រងរបួសធ្ងន់ និងខូតខាតរថយន្ត០១គ្រឿង ម៉ូតូ០១គ្រឿង។ ហេតុការណ៍នេះ បានកើតឡើងកាលពីវេលាម៉ោង១៣និង២០នាទី ថ្ងៃសៅរ៍ ១៣កើត ខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ ខែវិច្ឆិកា ឆ្នាំ២០១៩ តាមផ្លូវលំក្រាលកៅស៊ូសម្ដេចហ៊ុនសែនក្រវ៉ា ចំណុចភូមិបឹង ឃុំចើងដើង ស្រុកបារាយណ៍ ខេត្តកំពង់ធំ ។

សមត្ថកិច្ចបានអោយដឹងថា ម៉ូតូម៉ាកហុងដា ឌ្រីម  ពណ៌ខ្មៅ ពាក់ស្លាកលេខកណ្ដាល1I-1007 បើកបរដោយឈ្មោះទិត្យ សុភា ភេទប្រុស អាយុ១៣ឆ្នាំ នៅភូមិអូរក្រវ៉ាន់ ឃុំចំការអណ្ដូង ស្រុកចំការលើ ខេត្តកំពង់ធំ មុខរបរ សិស្ស  របួសធ្ងន់ (មិនពាក់មួកសុវត្តិភាព) អ្នករួមដំណើរឈ្មោះ ទិត្យ សុផាន់ណា ភេទប្រុស អាយុ១០ឆ្នាំ ត្រូវជាប្អូនបង្កើត នៅភូមិឃុំជាមួយគ្នា មុខរបរ សិស្ស  របួសធ្ងន់ (មិនពាក់មួកសុវត្តិភាព)។ ចំណែករថយន្តម៉ាកស្តារិច ពណ៌ទឹកប្រាក់ ពាក្យស្លាកលេខ ភ្នំពេញ 2G-7763 អ្នកបើកបរមិនស្គាល់អត្តសញ្ញាណ បើកគេចពីកន្លែងកើតហេតុយករថយន្តមកចតចោលនៅភូមិស្រែប្រាំង ឃុំតាប្រុក ស្រុកចំការលើ ខេត្តកំពង់ចាម។

សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បង្កឡើងដោយអ្នកបើកម៉ូតូបើកបរជែងក្នុងស្ថានភាពគ្រោះថ្នាក់។ ក្រោយកើតហេតុ សមត្ថកិច្ចបញ្ជូនជនរងគ្រោះទៅមន្ទីរពេទ្យ និងវាស់វែងធ្វើកំណត់ហេតុ និងប្រមូលវត្ថុតាង យកមករក្សាទុកនៅអធិការដ្ឋាននគរបាលស្រុក រង់ចាំដោះស្រាយគ្នាតាមច្បាប់ ៕ ប៊ុនរិទ្ធី