សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: បុរសម្នាក់បើករថយន្តមួយគ្រឿងបុកស្នាក់ការប៉ុស្ដិ៍២៤ម៉ោង មុខស្ថានទូតថៃ និងដើមឈើបាក់អស់១ដើម ហេតុការណ៍នេះ បានកើតឡើងកាលពីម៉ោង ២ និង៣០នាទីរំលងអធ្រាត្រ ឈានចូលថ្ងៃទី១១ ខែវិច្ឆិកា ឆ្នាំ២០១៩ ត្រង់ចំណុចមុខស្ថានទូតថៃ តាមបណ្ដោយផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ បើករថយន្តម៉ាក តូយ៉ូតាព្រូស ពណ៌ស ពាក់ស្លាក ភ្នំពេញ 2BC-5335 ធ្វើដំណើរតាមបណ្ដោយផ្លូវព្រះនរោត្ដមក្នុងទិសពីជើងទៅត្បូង យ៉ាងលឿន ខណៈមកដល់ចំណុចកើតហេតុ ស្រាប់តែរថយន្តរេចង្កូត ឆ្លងចូលមកផ្លូវបញ្ច្រាសទិស ទៅបុកប៉ុស្ដិ៍នគរបាល២៤ម៉ោង និងបន្តបុកដើមឈើបាក់អស់១ដើមកល់ជាប់ទៅមុខលែងរួច ប៉ុន្តែមិនបណ្ដាលឲ្យមនុស្សរងរបួសនោះទេ ។
បន្ទាប់ពីកើតហេតុសមត្ថកិច្ចចុះមកស្ទូចយករថយន្តបង្កទៅរក្សាទុក នៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ ៕ ជ្រោយពេជ្រ
