សារព័ត៌មាន នគរវត្ត តែងតែនាំមុខគេជានិច្ច
ស្ថានភាពនៅក្នុងតំបន់កាហ្សាកាន់តែតានតឹងថែមទៀតក្រោយពេលដែល មេដឹកនាំក្រុម អ៊ីស្លាមជីហាតរងការវាយប្រហារសម្លាប់ពីកម្លាំងទាហានអ៊ីស្រាអែល នៅតំបន់កាហ្សា ។
ក្រោយការវាយប្រហារ ក្រុមជីហាត និង ហាម៉ាសនៅកាហ្សាក៏បានបើកការវាយបកទៅលើទឹកដីអ៊ីស្រាអែល ដោយរ៉ុក្កែតជាច្រើនគ្រាប់ បានបាញ់ចេញពីកាហ្សាសម្តៅទៅកាន់ទឹកដីអ៊ីស្រាអែលនៅតំបន់ភាគខាងត្បូង ក្រោយកម្លាំងទាហានអ៊ីស្រាអែល បើកការវាយប្រហារតាមដែនអាកាស ទៅលើទីតាំងមេដឹកនាំ អ៊ីស្លាមជីហាត(Jihad)។
កម្លាំងទាហាន ការពារអ៊ីស្រាអែល IDFកាលពីថ្ងៃទី១២ ខែវិច្ឆិកា បានប្រកាសថា ខ្មាន់កាំភ្លើង ក្រុមប៉ាឡេស្ទីននៅកាហ្សាបានបាញ់រ៉ុក្កែតរាប់សិបគ្រាប់ទៅកាន់តំបន់ភាគខាងត្បូងអ៊ីស្រាអែល។ ភ្លាមៗនោះ កណ្តឹងប្រកាសអាសន្នរបស់អ៊ីស្រាអែលក៏បានបន្លឺឡើង ជាសញ្ញាឲ្យពលរដ្ឋ ចូលទៅលាក់ខ្លួននៅតំបន់មានសុវត្ថិភាព។ នៅពេលនេះ មិនទាន់មានព័ត៌មានស្តីពីការខូចខាត ទ្រព្យសម្បត្តិ និងអាយុជីវិតដោយការវាយប្រហារខាងលើនោះឡើយ។
ការវាយប្រហារខាងលើ កើតឡើង ក្រោយពេលកម្លាំងទាហានអ៊ីស្រាអែល បានប្រកាសថាបានវាយប្រហារទម្លាក់គ្រាប់ទៅលើផ្ទះមេបញ្ជាការ កម្លាំងប្រដាប់អាវុធអ៊ីស្លាម ជីហាត របស់ប៉ាឡេស្ទីន សម្លាប់មនុស្ស២នាក់ ក្នុងនោះមានមេដឹកនាំក្រុមជីហាត លោក Baha Abu al Ata ។
អ៊ីស្រាអែលបានចោទប្រកាន់មេដឹកនាំជីហាត លោក Baha Abu al Ata នៅពីក្រោយការវាយប្រហារ នាពេលកន្លងមក។ ក្រុមអ្នកសង្កេតការណ៍ បង្ហាញពីក្តីបារម្ភក្រោយការស្លាប់ Baha Abu al Ata អាចបង្កឲ្យមានការប៉ះទង្គិចគ្នាជាទ្រង់ទ្រាយធំកើតឡើង រវាងអ៊ីស្រាអែលនិងប៉ាឡេស្ទីន៕
