សារព័ត៌មាន នគរវត្ត តែងតែនាំមុខគេជានិច្ច
វិវាទនយោបាយនៅក្នុងប្រទេសប៊ូឡាវីឈានដល់ដំណាក់កាលថ្មីមួយទៀត ក្រោយពេល ក្រុមគ្រូពេទ្យ ត្រូវបានចាប់ខ្លួនដោយចោទប្រកាន់ចូលរួមជាមួយក្រុមបាតុករ ។ គ្រូពេទ្យ មួយចំនួនធំនៅក្នុងប្រទេសនេះគឺមកពីប្រទេសគុយបា តាមការស្នើសុំរបស់រដ្ឋាភិបាលចាស់ដើម្បីបំពេញ កង្វះគ្រូពេទ្យនៅប្រទេសនេះ។
ប៉ុន្តែនៅពេលនេះគុយបានបានសម្រេចដកគ្រូពេទ្យចេញ ដោយបញ្ហាមួយចំនួន។តាមសេចក្តីប្រកាសរបស់រដ្ឋាភិបាលគុយបា បានបញ្ជាក់ថា រាល់ការចោទប្រកាន់ទៅលើក្រុមគ្រូពេទ្យគុយបា ថាបានជួយដល់ក្រុមបាតុករ គឺជារឿងប្រឌិត មានចេតនា សំដៅទៅលើក្រុមគ្រូពេទ្យរបស់គុយបា។
កាលពីថ្ងៃទី១៥ខែវិច្ឆិកា ក្រសួងការបរទេសគុយបា បានចេញសេចក្តីប្រកាសថ្កោលទោសការចោទប្រកាន់ គ្រូពេទ្យបរទេស៤រូប ដែលកំពុងតែបំពេញការងារនៅក្នុងប្រទេសប៊ូឡាវី ត្រូវបានចាប់ខ្លួន ដោយចោទប្រកាន់ថាបានបំផុះបាតុករ ។ ជាមួយគ្នានេះក្រសួងការបរទេសគុយបា ស្នើរឲ្យដោះលែងជាបន្ទាន់គ្រូពេទ្យទាំង៤រូប ។
នៅក្នុងសេចក្តីប្រកាសរបស់រដ្ឋាភិបាលគុយបានបានបញ្ជាក់ថា រាល់ការចោទប្រកាន់ថា ក្រុមគ្រូពេត្យគុយបា ជួយដល់បាតុករ នៅប៊ូឡាវី គឺជាការ ចេតនាចោទប្រកាន់ដោយមិនមានភស្តុតាង។ ដោយហេតុនេះហើយបានជា រដ្ឋាភិបាល គុយបានបានសម្រេច ដក គ្រូពេទ្យទាំងអស់ ដែកកំពុងបំពេញការងារនៅប៊ូឡាវីត្រឡប់ទៅប្រទេសវិញ។
ស្ថានភាពនយោបាយនៅក្នុងប្រទេសប៊ូឡាវី កាន់តែតានតឹងក្រោយពេលដែលរដ្ឋាភិបាល របស់ប្រធានាធិបតី Evo Morales ត្រូវកម្លាំងទាហាននិងប៉ូលិសបង្ខំឲ្យលាលែងចេញពីតំណែង សកម្មភាពទាំងនោះ គឺជាការធ្វើរដ្ឋប្រហារ យោធាមិនបង្ហូឈាម។ បច្ចុប្បន្ន លោក Morales និងគ្រួសារបានភៀសខ្លួនទៅរស់នៅបណ្តោះអាសន្ននៅក្នុងប្រទេស ម៉ិចស៊ីកូ ដើម្បីសុវត្ថិភាព។
ក្នុងពេលជាមួយគ្នានេះ ប្រធានាធិបតីបណ្តោះអាសន្ន លោកស្រី Jeanine Anez បានប្រកាសថា អតីតប្រធានាធិបតិដែលភៀសខ្លួនទៅម៉ិចស៊ីកូ នោះ មិនអាច ឈរឈ្មោះជាបេក្ខភាព ក្នុងការបោះឆ្នោត ជ្រើសរើសប្រធានាធិបតីនោះឡើយ។ ការបោះឆ្នោត នឹងត្រូវរៀបចំឡើងក្នុងរយៈ៩០ ថ្ងៃចាប់តាំងពី លោក Evo Morales លាលែងចេញពីតំណែង ៕
