សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តកុងតឺន័រ១គ្រឿង បានបើកបោះពួយលឿនគេចពីម៉ូតូនៅខាងមុខជ្រុលធ្លាក់ចូលទៅក្នុងប្រឡាយទឹកស្អុយ បង្កការភ្ញាក់ផ្អើលកាលពីវេលាម៉ោង២និង៤០នាទីទៀបភ្លឺថ្ងៃទី២១ ខែវិច្ឆិកា ឆ្នាំ២០១៩ នៅតាមផ្លូវបេតុង ស្ថិតនៅភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ខណៈដែលគាត់ក្រោពីដំណេករៀបចំឥវាន់លក់ដូរ ស្រាប់តែឃើញរថយន្តម៉ាក PREIGHT LINER ពណ៌ស ពាក់ស្លាកលេខ ភ្នំពេញ 3D-9510 បើកបរធ្វើដំណើរពីទិសខាងត្បូងឆ្ពោះទៅជើង ហើយមកដល់ត្រង់ចំណុចកើតហេតុខាងលើ ស្រាប់តែរេចង្កូតទៅខាងឆ្វេងដៃ ជ្រុលធ្លាក់ចូលទៅក្នុងប្រឡាយទឹកស្អុយនោះតែម្ដង ។
ប្រជាពលរដ្ឋដដែលបានបន្តថា ពេលនោះសំណាងល្អរថយន្តអត់ក្រឡាប់ ហើយអ្នកបើបរនិងព្រូបើកទ្វារលូនចេញពីក្នុងរថយន្តដោយមិនមានរងរបួសឡើយ មិនតែប៉ុណ្ណោះ ប្រសិនបើអត់ធ្លាក់ប្រឡាយហើយរេចង្កូតមកខាងស្ដាំដៃវិញ និងបុកចូលផ្ទះពួកគាត់បណ្ដាលឲ្យមានគ្រោះថ្នាក់មិនខានឡើយ ។
ក្រោយពេលកើតហេតុខាងក្រុមហ៊ុនបានយករថយន្តស្ទូច១គ្រឿងទៅស្ទូចលើកយករថយន្តនេះ ហើយរហូតដល់វេលាម៉ោងជិត៩ព្រឹក ថ្ងៃដដែលទើបស្ទូចយកចេញបានរួចបានយកទៅធ្វើការជួសជុលឡើងវិញដោយខ្លួនឯង ។ ចំណែកឯនគរបាលមិនបានចុះទៅវាស់វែងនោះទេ ព្រោះរថយន្តនេះជួបគ្រោះថ្នាក់ដោយខ្លួនឯងមិនមានប៉ះពាល់ដល់អ្នកផ្សេងឡើយ ៕ សុខាសែនជ័យ
