សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ បានប៉ុនប៉ងធ្វើសកម្មភាពលួចម៉ូតូមួយគ្រឿង ប៉ុន្តែមិនទាន់បានសម្រេចផងត្រូវជនរងគ្រោះឃើញទាន់ស្រែកឆោឡោផ្អើលសមត្ថកិច្ចកំពុងជិះល្បាតក្បែរនោះជួយធ្វើអន្តរាគមន៍ចាប់ក្របួចជាប់តែម្តង ។
ករណីឃាត់ខ្លួនចោរលួចម៉ូតូខាងលើនេះ បានធ្វើឡើងកាលពីវេលាម៉ោង ៨និង៣០នាទីយប់ ថ្ងៃទី២៥ ខែវិច្ឆិកា ឆ្នាំ២០១៩ ត្រង់ចំណុចមុខផ្ទះលេខ៤៧C ផ្លូវ៣៦៨ ក្រុម៥១ ភូមិ០១ សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ ។
មន្រ្តីនគរបាលខណ្ឌបឹងកេងកង បានឲ្យដឹងថា ជនសង្ស័យឈ្មោះ មាស ឧត្តម ភេទប្រុស អាយុ ៣៣ឆ្នាំ ស្នាក់នៅផ្ទះជួល ផ្លូវ៩៩ សង្កាត់ផ្សាដើមថ្កូវ មុខរបរ មិនពិតប្រាកដ បានធ្វើសកម្មភាពប៉ុនប៉ងលួចម៉ូតូមួយគ្រឿងម៉ាកហុដា ស្កុបពី ពណ៌ផ្កាឈូក ស៊េរី២០១១ ពាក់ស្លាកលេខ ភ្នំពេញ 1AW-4418 ប៉ុន្តែមិនទាន់បានសម្រេចផង ក៏ត្រូវជនរងគ្រោះឃើញទាន់ស្រែកឆោឡោផ្អើលដល់កម្លាំងល្បាតនៅក្បែរនោះជួយធ្វើអន្តរាគមន៍ឃាត់ខ្លួនភ្លាមៗ ។ បន្ទាប់ពីកើតហេតុម៉ូតូត្រូវបានប្រគល់ជូនជនរងគ្រោះវិញ ។
បច្ចុប្បន្នជនសង្ស័យ ត្រូវបានឃាត់ខ្លួននៅអធិការដ្ឋាន ជាបណ្តោះអាសន្ន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ៕ស រស្មី
