សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ទីបំផុតមន្ទីរសម្រាកព្យាបាលជងឺ«សុខាប៉ោយប៉ែត» មានទីតាំងស្ថិតនៅក្នុងភូមិបាលិលេយ្យ១ សង្កាត់និងក្រុងប៉ោយប៉ែត ត្រូវបានក្រសួងសុខាភិបាលបានបញ្ជាឲ្យបិទធ្វើអាជីវកម្មហើយ បន្ទាប់ពីមានរឿងអាស្រូវព្យាបាលមនុស្សបណ្តាលឲ្យស្លាប់ច្រើនលើក ។ មន្ទីរសម្រាកព្យាបាលជំងឺខាងលើនេះ គេបានឃើញម្ចាស់រុះរើទម្លាក់ប៉ាយយីហោចុះតាំងពីថ្ងៃទី២៦ ខែវិច្ឆិកា ឆ្នាំ២០១៩ ដោយបន្តរើសម្ភារចេញរហូតយប់ ។
គួរបញ្ជាក់ថា មុនពេលមន្ទីរសម្រាកព្យាបាលសុខាប៉ោយប៉ែត រុះរើទម្លាក់ប៉ាយនេះ គឺមានស្ត្រីរងគ្រោះម្នាក់ឈ្មោះទេព្យ ចិន្តា អាយុ៤០ឆ្នាំ ជាកម្មកររោងចក្រ និងមានទីលំនៅភូមិព្រៃព្រិចសង្កាត់ និងក្រុងប៉ោយប៉ែតមានអាការមិនស្រួលខ្លួនឈឺក្បាល និងអស់កម្លាំងបានទៅព្យាបាលទីនោះ តែក្រោយបន្តោងសេរ៉ូមដល់កំប្លោកទី៣ ជនរងគ្រោះបែរជាមានសភាពធ្ងន់ធ្ងរឡើយទៅវិញ ។
ប្រភពបន្តថា ខណៈដឹកបញ្ជូនជនរងគ្រោះបន្តទៅមន្ទីរពេទ្យបង្អែក ក្រុងប៉ោយប៉ែត ក៏បានបាត់បង់ជីវិតតែម្តង ។ ដំបូងក្រុមគ្រួសានិងសាច់ញាតិបានឡាំប៉ាថា និងដាក់ពាក្យបណ្តឹងពីម្ចាស់មន្ទីរសម្រាកព្យាបាលខាងលើ តែក្រោយមកបែរជាលោកវ៉ាន់ ចេស ម្ចាស់មន្ទីរសម្រាកព្យាបាលប្រាប់អ្នកព័ត៌មានវិញថា គ្រួសាររងគ្រោះនិងខាងលោកព្រមទទួលយកកាដោះស្រាយគ្នាហើយ ។
ពាក់ព័ន្ធដំណោះស្រាយនេះ ប្រភពថាតំណាងភាគីរងគ្រោះទាមទារ១ម៉ឺនដុល្លារ តែបញ្ចប់ត្រឹម5000ដុល្លារ។យ៉ាងណាក៏ដោយ ពេលសាកសួរតាមទូរស័ព្ទរឿងដំណោះស្រាយថា តើដូចប្រភពដែលគេទទួលបានឬទេ? ម្ចាស់មន្ទីរសម្រាកព្យាបាលសុខាប៉ោយប៉ែត និងជាមន្ត្រីពេទ្យនៅមន្ទីរពេទ្យបង្អែកក្រុងប៉ោយបែតផង លោកវ៉ាន់ ចេស បានបដិសេធសុំមិនធ្វើអត្ថាធិប្បាយទេ ។
លោកវ៉ាន់ ចេស ប្រាប់ថា ការទម្លាក់ប៉ាយមន្ទីរសម្រាកព្យាបាលរបស់លោកនាពេលនេះ គឺលោកធ្វើតាមខាងក្រសួងសុខាភិបាលបញ្ជាឲ្យបិទអាជីវកម្មលោកហើយ កាលពីថ្ងៃទី២៥ វិច្ឆិកា មកនេះ ។ បើទោះជាទីតាំងសម្រាកព្យាបាលសុខាប៉ោយប៉ែត ត្រូវបានក្រសួងសុខាភិបាលតម្រូវឱ្យបិទទ្វារ តែគេឃើញក្រុមគ្រូពេទ្យនាំគ្ណារើសម្ភារចូលទៅទីតាំងចាស់មួយទៀត ដែលមានយីហោ«បន្ទប់ពិគ្រោះនិងព្យាបាលជម្ងឺVANNCHES MEDICAL CABINET»ដែលទីតាំងចាស់មួយនេះ ជារបស់លោកវ៉ាន់ ចេស នេះដដែល ។ ឃើញសកម្មភាពបែបនេះ អ្នកសារព័ត៌មានសួរថា តើត្រឹមត្រូវនឹងច្បាប់របស់ក្រសួងសុខាភិបាលដែរទេ? លោកវ៉ាន់ ចេស និយាយយ៉ាងសុភាពគួរឱ្យអាណិតថា «បងអើយ ខ្ញុំធ្លាក់ដុនដាបគេបិទគ្លីនិកខ្ញុំៗបើកជាលក្ខណៈCABINETតូចតាច ដើម្បីចិញ្ចឹមឆ្នាំងទេ គ្មានចង់ធ្វើមានបានឡើយ » ៕ ប្រាថ្នា
