សារព័ត៌មាន នគរវត្ត តែងតែនាំមុខគេជានិច្ច
គ្រាប់មីនរាប់រយតោន ត្រូវបានភាគីទាំងពីរ អាមេរិក និងអាហ្វហ្គានីស្ថាន ប្រើប្រាស់ ដើម្បីប្រឆាំងគ្នាទៅវិញទៅមក ។ នៅពេលនេះ អាចនិយាយបានថាសង្គ្រាម នៅអាហ្វហ្គានីស្ថានបានបញ្ចប់ទៅហើយ ប៉ុន្តែការស្លាប់របស់ពលរដ្ឋ ដោយសារតែ គ្រាប់មីនមិនទាន់ផ្ទុះ ឬបង្កប់តាមដង់ផ្លូវ បានសម្លាប់ពលរដ្ឋអាហ្វហ្គានីស្ថានជាបន្តបន្ទាប់ ។
ទាំងនោះហើយជាលទ្ធផលបន្សល់ទុក ក្រោយសង្គ្រាម នៅពេលនជនស៊ីវិលអាហ្វហ្គានីស្ថានយ៉ាងតិច១៥នាក់ ក្នុងនោះស្ត្រី៦នាក់ និងកុមារ៨នាក់ បានបាត់បង់ជីវិត ខណៈដែលរថយន្តរបស់ពួកគេធ្វើចរាចរណ៍បានបើកបរជាន់លើគ្រាប់បែកកប់នៅតាមផ្លូវហាយវ៉េ បណ្ដាលឲ្យផ្ទុះកាលពីថ្ងៃទី២៧ ខែវិច្ឆិកា ឆ្នាំ២០១៩ ស្ថិតនៅខេត្តភាគខាងជើងរបស់ប្រទេសអាហ្វហ្គានីស្ថាន ។ ហេតុការណ៍នេះក៏នៅបានបណ្តាលឲ្យរងរបួស មនុស្សពីរនាក់បន្ថែមទៀតផងដែរ ។
អ្នកនាំពាក្យរបស់ក្រសួងមហាផ្ទៃអាហ្វហ្គានីស្ថាន បានចាត់ទុកថា វាជាសកម្មភាពរបស់ក្រុមឧទ្ទាមតាលីបង់ ដែលបានបង្កប់គ្រាប់បែកនៅតាមដងផ្លូវ ស្ថិតនៅក្នុងខេត្ត Kunduz នោះ ។
ប្រភពពីមន្ត្រីក្នុងតំបន់បានថ្លែងថា ជនរងគ្រោះទាំងនោះ បាន និងកំពុងនាំគ្នាធ្វើដំណើរទៅចូលរួមពិធីអាពាហ៍ពិពាហ៍មួយ ស្ថិតនៅក្នុងស្រុក Imam Sahib ។ ទីតាំងនោះជាកន្លែងប្រយុទ្ធយ៉ាងខ្លាំងក្លារវាងកងកម្លាំងរដ្ឋាភិបាលអាហ្វហ្គានីស្ថាន និងក្រុមឧទ្ទាមតាលីបង់ ។
ជនស៊ីវិលនៅក្នុងប្រទេសអាហ្វហ្គានីស្ថាន បានបន្តបាត់បង់ជីវិតរៀងដរាប ខណៈដែលអំពើហិង្សាក្នុងសង្គ្រាមប្រឆាំងភេរវកម្មនោះ បានចូលដល់ឆ្នាំទី១៩ហើយ កាលពីខែមុន ។
របាយការណ៍របស់អង្គការសហប្រជាជាតិ បានចេញផ្សាយថា ជនស៊ីវិលអាហ្វហ្គានីស្ថានប្រហែល ២ ៦០០នាក់ បានបាត់បង់ជីវិត ក្នុងអំឡុងពេលប្រាំបួនខែនៃឆ្នាំ២០១៩នេះ និង ៥ ៦០០នាក់បានរងរបួសធ្ងន់ ស្រាល ៕
