រឹបអូសរថយន្ត២គ្រឿងដែលស្ត្រីជនជាតិវៀតណាមជួលជិះតែយកទៅបញ្ចាំប្រគល់ឲ្យម្ចាស់ដើមវិញ

ខេត្តតាកែវ: សមត្ថកិច្ចចម្រុះដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តតាកែវ និងមានការដឹកនាំបញ្ជាពីលោក សុខ សំណាង ស្នងការនគរបាលខេត្តតាកែវ នៅ ថ្ងៃ ព្រហស្បតិ៍ ២កើត ខែមិគសិរ ឆ្នាំ កុរ ឯកស័ក ព.ស.២៥៦៣​. ត្រូវនឹងថ្ងៃទី២៨ ខែវិច្ឆិកា ឆ្នាំ២០១៩ វេលាម៉ោង ១១ព្រឹក កម្លាំងជំនាញ នៃស្នងការដ្ឋាននគរបាលខេត្តតាកែវ សហការជាមួយកម្លាំងជំនាញ នៃស្នងការដ្ឋាននគរបាលខេត្តកំពត បានធ្វើការស្រាវជ្រាវ និងដកហូតបានរថយន្តចំនួន ២គ្រឿង មួយគ្រឿងមានម៉ាក Fortuner ពណ៌ទឹកប្រាក់ ស៊េរី២០១៦ ពាក់ស្លាកលេខ 68A-052.41 និងទី២ម៉ាក Fortuner ពណ៌ទឹកប្រាក់ ស៊េរីឆ្នាំ២០១៩ ពាក់ស្លាកលេខ 68A-140.07 ពាក់ព័ន្ធករណីរំលោភលើទំនុកចិត្ត ប្រព្រឹត្តនៅប្រទេសវៀតណាម។

សមត្ថកិច្ចបានឲ្យដឹងថា ជនសង្ស័យមានឈ្មោះ ច្រឹង ធីវី ភេទស្រី អាយុ ៣៩ឆ្នាំ (ជនជាតិវៀតណាម)រស់នៅខេត្តកៀនយ៉ាង ប្រទេសវៀតណាម បានធ្វើសកម្មភាពជួលរថយន្តទាំង ២គ្រឿងខាងលើពីឈ្មោះ វី ង៉ុកទៀង ភេទស្រី អាយុ ៤២ឆ្នាំ និងឈ្មោះ កាវ វាំងចាំ ភេទប្រុស អាយុ ៣៧ឆ្នាំ ទាំង២នាក់ រស់នៅខេត្តកៀនយ៉ាង ប្រទេសវៀតណាមរួចយក មកដាក់បញ្ចាំឲ្យឈ្មោះ ហេង ស្រីវ៉ាន ភេទស្រី អាយុ ៤៦ឆ្នាំ និងឈ្មោះ ស្តើង សុខន ភេទស្រី អាយុ ៥៣ឆ្នាំ រស់នៅភូមិផ្សារ ឃុំភ្នំដិន ស្រុកគិរីវង់ ខេត្តតាកែវ ។

ក្រោយពិនិត្យឯកសារគ្រប់គ្រាន់ រថយន្តទាំង ២គ្រឿង ត្រូវបានប្រគល់ជូនម្ចាស់ដើមវិញ ចំណែកអ្នកទទួលបញ្ចាំ កម្លាំងជំនាញកំពុងធ្វើការសាកសួរ ដើម្បីស្វែងរកចាប់ខ្លួនជនសង្ស័យជាអ្នកយកទៅបញ្ចាំយកមកផ្តន្ទាទោសតាមច្បាប់បន្តទៀត ៕ ប្រាថ្នា