ក្រុមហ៊ុនអំពៅស្រុកស្វាយទាបចូលរួមចំណែកជាមួយរាជរដ្ឋាភិបាលដើម្បីកាត់បន្ថយភាពក្រីក្រ ជ្រើសរើសកម្មករឲ្យមានការងារធ្វើ បន្ថយចំណាកស្រុក

ចែករំលែក៖

ខេត្តស្វាយរៀង ៖ ប្រជាពលរដ្ឋរស់នៅតំបន់ព្រំដែនមានការងារធ្វើ ខណៈដែលរដូវប្រមូលផលអំពៅចូលមកដល់ និងត្រៀមដាំដុះឡើងវិញដោយក្រុមហ៊ុន អីសធើនរ៉ាយហ្វៀលឌីវ៉េលុបមែនខូលអិលធីឌីដាំអំពៅស្ករ ត្រូវការជ្រើសរើសកម្មករទាំង២ភេទជាច្រើនពាន់នាក់ ដើម្បីដាំដុះដំណាំអំពៅ និងអ្នកកាប់ប្រមូលផលអំពៅលើផ្ទៃដី៦,០០០ហិកតារបស់ក្រុមហ៊ុន ។

បើតាមលោក កុយ សារ៉េន ប្រធានក្រុមហ៊ុន ដាំអំពៅស្ករបានឲ្យដឹងថា ក្រុមហ៊ុនរបស់លោកត្រូវការកម្លាំងពលកម្មមកធ្វើការចាប់ពី ៣.៥០០នាក់ ទៅ៤៥០០នាក់ ដើម្បីដាំដុះដំណាំ និងត្រៀមប្រមូលផលអំពៅ នៅថ្ងៃទី៩ ខែធ្នូ ឆ្នាំ២០១៩ខាងមុខនេះ លើផ្ទៃដីប្រមាណជាង៦,០០០ហិកតា ដែលមានទិន្នផលសរុប៣០០.០០០តោន ដែលស្ថិតនៅឃុំពងទឹក ឃុំបុសមន ស្រុករំដួល ឃុំគគីរសោម ឃុំព្រៃតាអី ឃុំពពែត ឃុំមនោរម្យ ស្រុកស្វាយទាប និងឃុំត្រស់ស្រុករមាសហែកខេត្តស្វាយរៀង ។

លោកបានបន្តទៀតថា ខាងក្រុមហ៊ុនលោកបានដាក់ទុនវិនិយោគលើដំណាំគួបផ្សំជាច្រើនមុខលើផ្ទៃដីជាច្រើនហិកតា ជាពិសេសជាងនេះទៀតនោះ គឺចូលរួមចំណែកជាមួយរាជរដ្ឋាភិបាលកម្ពជាក្នុងការកាត់បន្ថយភាពក្រីក្រ កាត់បន្ថយការចំណាកស្រុករបស់បងប្អូនប្រជាពលរដ្ឋ ដែលមានផ្ទះជិតមូលដ្ឋាន ដែលក្រុមហ៊ុនមានការដំដុះនូវដំណាំខាងលើនេះ ហើយរកចំណូលបានល្អប្រសើរមិនបាច់ចេញទៅរកការងារនៅឆ្ងាយក្រៅស្រុកនោះទេ

ចំពោះអ្នកកាប់អំពៅក្រុមហ៊ុនគិតតម្លៃអាចរកបានច្រើនគួរសមក្នុងមួយថ្ងៃម្នាក់អាចរកប្រាក់ថ្លៃឈ្នួលកាប់អំពៅចាប់ពី៥ម៉ឺនរៀល ទៅ៦ម៉ឺនរៀល ។

លោកក៏បានលើកឡើងពីវិស័យកសិឧស្សាហកម្មក្នុងស្រុកស្វាយទាបក្នុង ឃុំមួយចំនួន មានការអភិវឌ្ឍន៍ហួសពីការស្មាន ដោយខាងក្រុមហ៊ុនរបស់លោក ជួយស្វែងរកអ្នកវិនិយោគ និងជួយកសាងជុសជុលផ្លូវមួយចំនួន ងាយស្រួលដល់បងប្អូនលោកតា លោកយាយ ក្នុងការធ្វើដំណើរ និងដឹកកសិផល ទៅលក់លើទីផ្សារ ព្រមទាំងក្រុមហ៊ុនជួយការងារសង្គមជាច្រើន ក៏ដូចជាឧបត្ថមជាសម្ភារសិក្សា និងថវិកាមួយចំនួនដល់ប្អូនៗសិស្សានុសិស្សដែលមានជីវភាពក្រីក្រខ្វះខាតជារៀងរាល់ឆ្នាំផងដែរ ។

សូមបញ្ជាក់ថា ក្រោមការដឹកនាំដ៏ឆ្លៀសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីនៃ កម្ពុជា ទូទាំងប្រទេសមានការរីកចម្រើនលើគ្រប់វិស័យ ពិសេសវិស័យកសិកម្មដោយអភិវឌ្ឍន៍លើដំណាំ កៅស៊ូ អំពៅ ដំឡូងមី និងផលិតស្រូវ មានការកើនឡើងជា លំដាប់ ជាក់ស្តែងនៅប៉ុន្មានឆ្នាំចុងក្រោយនេះក្នុងខេត្ត ស្វាយរៀងបាន នាំផលិតផលអំពៅ ពោត ដំឡូងមី និងកៅស៊ូ រាប់សិបតោនទៅកាន់ទីផ្សារក្រៅខេត្ត ដើម្បីប្រប្រមូលរូបីយបណ្ណ័បរទេស យកមកអភិវឌ្ឍន៍ខេត្ត និងលើកស្ទួយជីវភាពប្រជាពលរដ្ឋនៅ ក្នុងតំបន់បានល្អមួយ កម្រិតទៅតាមគោលនយោបាយលើកស្ទួយសេដ្ឋកិច្ចជាតិទាំងមូលផងដែរ ៕ យឹម សុថាន