សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ ជន សង្ស័យពីរនាក់ត្រូវបានសមត្ថកិច្ចឃាត់ខ្លួន កាលពីថ្ងៃទី៥ ខែធ្នូ ឆ្នាំ២០១៩ នៅចំណុចផ្លូវលេខ៩ ស្ថិតនៅក្នុងភូមិចំការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ ករណីហិង្សាដោយចេតនា បង្កឡើងដោយជនសង្ស័យចំនួន០២នាក់ បានផ្លោះតាមរបងទៅវាយជនរងគ្រោះបណ្តាលឲ្យរងរបួស ។
សមត្ថកិច្ចបានឲ្យដឹងថា ជនបង្កមាន ឈ្មោះ សាន ឌិត ភេទប្រុស អាយុ៣៨ឆ្នាំ រស់នៅភូមិកើតហេតុ, ឈ្មោះ អាន វៃ ភេទប្រុស អាយុ៤០ឆ្នាំ រស់នៅភូមិកើតហេតុ ពួកគេបានធ្វើសកម្មភាពយកដំបងឈើវាយទៅលើជនរងគ្រោះឈ្មោះ ឆាយ សុចិន្តា ភេទប្រុស អាយុ៣១ឆ្នាំ មុខរបរជាងសិប្បកម្ម រស់នៅភូមិកើតហេតុខាងលើ បណ្តាលឲ្យរបួសបែកក្បាល១២ថ្នេរ។
សមត្ថកិច្ចបានបន្តថា មូលហេតុដែលបង្កឲ្យមានអំពើហិង្សាខាងលើ ដោយសារតែ ជនបង្ក និងជនរងគ្រោះមានផ្ទះជាប់គ្នា ។ នៅថ្ងៃកើតហេតុនោះ ជនបង្កបានដុតសំរាមក្បែររបងផ្ទះ ហើយជនរងគ្រោះបានហាម និងយកទូរស័ព្ទមកថត ក៏កើតរឿងឈ្លោះប្រកែកគ្ នា។ ភ្លាមៗនោះ ជនបង្ក ក៏យកដំបងឈើ ហើយផ្លោះតាមរបងចូលទៅវាយដល់ក្នុងបរិវេណដីផ្ទះ បណ្តាលឲ្យមានរបួស រួចគេចខ្លួនបាត់ ។
បច្ចុប្បន្ន ជនសង្ស័យទាំង០២នាក់ខាងលើ ត្រូវបានឃាត់ខ្លួននៅប៉ុស្តិ៍នគរបាលរដ្ឋបាលអូរស្មាច់ ដើម្បីសាកសួរ និងកសាងសំណុំរឿងតាមនីតិវិធី ៕ ប៉ែន នួន
