សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនជាតិវៀតណាមម្នាក់ត្រូវបានសមត្ថកិច្ចនគរបាលឃាត់ខ្លួន បន្ទាប់ពីបើកត្រាក់ទ័រមិនមើលក្រោយ កិនបុរសម្នាក់ស្លាប់នៅក្នុងទឹកត្រពាំង កាលពីវេលាម៉ោង១១ និង៣០នាទីព្រឹក ថ្ងៃទី០៩ ខែធ្នូ ឆ្នាំ២០១៩ ស្ថិតក្នុងភូមិស្វាយគយ ឃុំពពែត ស្រុកស្វាយទាប ខេត្តស្វាយរៀង ។
សមត្ថកិច្ចនគរបាលស្រុកស្វាយទាបបានឲ្យដឹងថា ដោយបានទទួលព័ត៌មានតាមរយះទូរស័ព្ទពីប្រជាពលរដ្ឋ បានរាយការណ៍មកសមត្ថកិច្ចថានៅចំណុចត្រពាំងតាពៅ ស្ថិតក្នុងភូមិស្វាយគយ ឃំុពពែត ស្រុកស្វាយទាប ខេត្តស្វាយរៀង មានមនុស្សស្លាប់នៅក្នុងទឹកត្រពាំងក្បែរកន្លែងត្រាក់ទ័រភ្ជួរដីស្រែ ។
សមត្ថកិច្ចបានបន្តទៀតថា ក្រោយពីទទួលបានព័ត៌មាននេះភ្លាម សមត្ថកិច្ចបានដឹកនាំកម្លាំងជំនាញសហការជាមួយសមត្ថកិច្ចនគរបាលស្រុកស្វាយទាប និងក្រុមគ្រូពេទ្យ ដោយមានការសម្របសម្រួលពីលោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀងបាន ចុះពិនិត្យដល់កន្លែងកើតហេតុពិនិត្យឃើញថា សាកសពដែលស្លាប់គឺមានឈ្មោះ ផៃ ផាត ភេទប្រុស អាយុ៣៣ឆ្នាំ ជនជាតិខ្មែរ មុខរបរ ធ្វើស្រែ មានទីលំនៅភូមិស្វាយគយ ឃុំពពែត ស្រុកស្វាយទាប ខេត្តស្វាយរៀង ។
ចំណែកជនសង្ស័យមានឈ្មោះ ង្វៀង ជីតាំ ភេទប្រុស អាយុ២៩ឆ្នាំ ជនជាតិវៀតណាម មានទីលំនៅភូមិតាំងចូវ ឃុំតាំងងរ ស្រុកតាំងចូវ ខេត្តតៃនិញ ប្រទេសវៀតណាម ដែលជាអ្នកបើកត្រាក់ទ័រភ្ជួរដី ។
សមត្ថកិច្ចបានបញ្ជាក់ថា ផ្អែកតាមការពិនិត្យរបស់សមត្ថកិច្ចជំនាញខេត្ត និងគ្រូពេទ្យកោសល្យវិច័យឃើញថា នៅលើខ្លួនប្រាណសាកសពមានស្នាមបែកលលាដ៍ក្បាល និងបាក់ថ្គាមទាំងសងខាង ។
តាមការសន្និដ្ឋានរបស់សមត្ថកិច្ចជំនាញខេត្ត និងគ្រូពេទ្យកោសល្យវិច័យ បញ្ជាក់ថា សាកសពអាចស្លាប់ដោយសារអ្នកបើកត្រាក់ទ័រភ្ជួរដីកិន ខណៈដែលជនរងគ្រោះកំពុងធ្វើម្លុងនៅមាត់ត្រពាំង ។
នៅចំពោះមុខសមត្ថកិច្ចឈ្មោះង្វៀង ជីតាំ បានឆ្លើយសារភាពថា នៅពេលខ្លួនថយត្រាក់ទ័រចូលទៅក្នុងបឹងដើម្បីភ្ជួរដីមាត់បឹងនោះមិនបានឃើញមនុស្សទេ ពេលបើកត្រាក់ទ័រឡើងវិញ ទើបឃើញមនុស្សត្រូវត្រាក់ទ័រកិនស្លាប់តែម្ដង ៕ យឹម សុថាន
