សារព័ត៌មាន នគរវត្ត តែងតែនាំមុខគេជានិច្ច
សំណុំរឿងប្រល័យពូជសាសន៍ បានធ្វើឲ្យប្រជាប្រិយភាពរបស់លោកស្រី អ៊ុងសានស៊ូជី ធ្លាក់ចុះយ៉ាងខ្លាំង ។ នៅពេលនេះដែរ លោកស្រី ស៊ូជីបានធ្វើដំណើរទៅកាន់ទីក្រុងឡាអេ តាមការកោះហៅរបស់តុលាការ ដើម្បីបកស្រាយសំណុំរឿង ជនជាតិរ៉ូហ៊ីងយ៉ា ។
នៅរដ្ឋធានីណៃពិដាវ របស់មីយ៉ានម៉ា ប្រជាជនមីយ៉ាន់ម៉ាជាច្រើនពាន់នាក់ បានជួបជុំគ្នា លើកបដាស្រែកជ័យឃោស ដើម្បីសម្តែងការគាំទ្រ ដល់លោកស្រី អ៊ុងសាន ស៊ូជី ដែលលោកស្រី នឹងត្រូវចេញដំណើរទៅកាន់ទីក្រុងឡាអេ ដើម្បីចូលរួមសវនាកា តុលាការអន្តរជាតិ។ តុលាការក្រុងឡាអេ នឹងបើកសវនាការ នៅថ្ងៃទី១០ធ្នូ ទៅលើពាក្យបណ្តឹង ដែលគេចោទមីយ៉ាន់ម៉ា ពីបទឧក្រិដ្ឋកម្មប្រល័យពូជសាសន៍ ធ្វើទៅលើជនជាតិរ៉ូហ៊ីងយ៉ា។
នៅលើបដារបស់ប្រជាជនមីយ៉ាន់ម៉ា មានសរសេរជាអាថទិថា “ពួកយើងគាំទ្រ ថ្នាក់ដឹកនាំយើងជានិច្ច”។ លោក ទិន លីនអ៊ូ អ្នកនិពន្ធមីយ៉ាន់ម៉ាម្នាក់ ដែលមានវត្តមានក្នុងពេលជួបជុំនោះដែរ បានស្រែកក្តែងក្តែង តាមឧឃោសនសព្ទ័ ថា៖ “ប្រជាជនមីយ៉ាន់ម៉ាមានមោទនភាពណាស់ ដែលលោកស្រីអ៊ុងសាន ស៊ូជី ទទួលភារៈកិច្ចការពារកិត្តិយសរបស់មីយ៉ាន់ម៉ា នៅមុខតុលាការអន្តរជាតិទីក្រុងឡាអេ”។ ចំណែក លោក វិន ស្វេ ប្រជាជនមីយ៉ាន់ម៉ាម្នាក់រស់នៅក្នុងក្រុងណៃពិដាវ បានប្រាប់អ្នកយកព័ត៌មានបារាំង AFP ក្នុងទឹកមុខចងកំហឹងថា៖ “គេមិនមែនចោទបុគ្គលណាឲ្យចំទេ តែគឺគេបានចោទប្រជាជនមីយ៉ាន់ម៉ាទាំងមូលតែម្តង”។
សូមបញ្ជាក់ថា ប្រទេសហ្កំប៊ីជាតំណាឲ្យប្រទេសចំនួន៥៧ នៃក្រុមប្រទេសសហប្រតិបត្តិការអ៊ីស្លាម បានដាក់ពាក្យប្តឹងទៅតុលាការអន្តរជាតិក្រុងឡាអេ ដោយបានចោទរដ្ឋាភិបាល និងកងទ័ពមីយ៉ាន់ម៉ា ពីបទឧក្រិដ្ឋកម្មប្រល័យពូជសាសន៍ ធ្វើទៅលើជនជាតិរ៉ូហ៊ីងយ៉ា។ លោកស្រីអ៊ុងសាន ស៊ូជី ត្រូវធ្វើដំណើរទៅចូលរួមសវនាកាដើម្បីឆ្លើយការពារមីយ៉ាន់ម៉ា ដែលសវនាកានេះ នឹងចាប់ផ្តើមបើកពីថ្ងៃទី១០ ដល់ថ្ងៃទី១២ធ្នូ។
សូមរំលឹកថា នៅរវាងខែសីហា ឆ្នាំ២០១៧ ជនជាតិរ៉ូហ៊ីងយ៉ា ក្នុងរដ្ឋរ៉ាឃីនភាគខាងលិចមីយ៉ាន់ម៉ា ចំនួនប្រមាណ៧សែន៤ម៉ឺននាក់ បានរត់ភៀសខ្លួនទៅកាន់បង់ក្លាដែស បន្ទាប់ពីកងទ័ពមីយ៉ាន់ម៉ា សហការជាមួយកម្លាំងប្រជាជន ចេញប្រតិបត្តិការបណ្តេញ វាយ ចាប់ចង សម្លាប់ និង ដុតផ្ទះទាំងភូមិៗ។ យ៉ាងហោចណាស់ មានជនជាតិរ៉ូហ៊ីងយ៉ា ១ម៉ឺននាក់ត្រូវបានគេសម្លាប់ក្នុងប្រតិបត្តិការនេះ។ យោងតាមអង្គការសិទ្ធិមនុស្ស និងអ្នកជំនាញនៃអង្គការសហប្រជាជាតិ សកម្មភាពហិង្សា រៀបចំដោយកងទ័ពមីយ៉ាន់ម៉ានេះ វាមានទ្រង់ទ្រាយជាការបោសសំអាតពូជសាសន៍ សម្លាប់ ឬបណ្តេញជនជាតិរ៉ូហ៊ីងយ៉ា ដែលជាអ្នកកាន់សាសនាអ៊ីស្លាម ឲ្យអស់ពីដីមីយ៉ាន់ម៉ា។
ដោយឡែកលោកស្រីអ៊ុងសាន ស៊ូជី បានចេញមុខការពាររដ្ឋាភិបាលនិងកងទ័ពមីយ៉ាន់ម៉ា ថាពុំមានសកម្មភាពប្រល័យពូជសាសន៍នោះទេ។ គោលជំហរនេះ បានធ្វើឲ្យកិត្តិនាម នៃអតីតនិមិត្តរូបអ្នកតស៊ូដើម្បីប្រជាធិបតេយ្យរូបនេះ ធ្លាក់ចុះជាខ្លាំង នៅលើឆាកអន្តរជាតិ។
គួរកត់សំគាល់ផងដែរថា ការជួបជុំគាំទ្រលោកស្រីអ៊ុងសាន ស៊ូជី របស់ប្រជាជនមីយ៉ាន់ម៉ា នៅក្រុងណៃពិដាវ មុននឹងលោកស្រីធ្វើដំណើរទៅកាន់ទីក្រុងឡាអេនេះ គឺធ្វើឡើងនៅចំពេលដែលលោកស្រី ទទួលជួប លោករដ្ឋមន្ត្រីការបរទេសចិន។ បើតាមការវិភាគ លោកស្រីសង្ឃឹមបញ្ចុះបញ្ចូលចិន ឲ្យបោះឆ្នោតវ៉េតូ កាពារមីយ៉ាន់ម៉ា នៅឯក្រុមប្រឹក្សាសន្តិសុខនៃអង្គការសហប្រជាជាតិ ក្នុងករណីមានគម្រោងដាក់ទណ្ឌកម្មណាមួយ លើមីយ៉ាន់ម៉ា។
នៅថ្ងៃទី១០ ខែធ្នូ ឆ្នាំ២០១៩ លោកស្រីអ៊ុងសាន ស៊ូជី មេដឹកនាំរបស់មីយ៉ាន់ម៉ាបានវត្តមាននៅតុលាការទីក្រុងឡាអេ ដើម្បីតតាំងបណ្តឹងប្រល័យពូជសាសន៍លើសំណុំរឿងសហគមន៍ជនជាតិភាគតិចរ៉ូហ៊ីងយ៉ា ។
ម្ចាស់ពានរង្វាន់ណូបែលសន្តិភាព លោកស្រីអ៊ុងសានស៊ូជី ត្រូវបានកំណត់នៅថ្ងៃអង្គារនេះថា នឹងការពារមីយ៉ាន់ម៉ានៅទីក្រុងឡាអេ ប្រឆាំងនឹងការចោទប្រកាន់ពីបទប្រល័យពូជសាសន៍ ។ មេដឹកនាំស៊ីវិលរបស់មីយ៉ាន់ម៉ា នឹងបង្ហាញខ្លួននៅតុលាការយុត្តិធម៌អន្តរជាតិ ការពារទៅនឹងការចោទប្រកាន់ថា មីយ៉ាន់ម៉ាបានព្យាយាមលុបបំបាត់ចោល នូវជនជាតិភាគតិចរ៉ូហ៊ីងយ៉ា នៅក្នុងការបង្ក្រាបរបស់យោធាកាលពីឆ្នាំ២០១៧នោះ ។
ប្រទេស ហ្គំប៊ី (Gambia)នៅអាហ្រ្វិកខាងលិច បានប្តឹងប្រទេសមីយ៉ាន់ម៉ាទៅកាន់តុលាការយុត្តិធម៌អន្តរជាតិទីក្រុងឡាអេ ជុំវិញការបង្ហូរឈាមនេះ ដោយចោទប្រកាន់ប្រទេសមីយ៉ាន់ម៉ាថា បានរំលោភលើអនុសញ្ញាប្រល័យពូជសាសន៍ ឆ្នាំ ១៩៤៨ ។
លោកស្រី ស៊ូជី បានចេញដំណើរទៅកាន់ប្រទេសហូឡង់កាលពីថ្ងៃទី៨ ខែធ្នូ ឆ្នាំ២០១៩ ។ លោកស្រី នឹងចេញមុខការពារដោយផ្ទាល់លើការចោទប្រកាន់ពីសំណាក់ប្រទេស ហ្គំប៊ី (Gambia) ដោយតំណាងឲ្យអង្គការសហប្រតិបត្តិការឥស្លាម (OIC) ដែលប្រព្រឹត្តទៅចាប់ផ្តើមនៅថ្ងៃទី១០ ខែធ្នូ នេះតទៅ ។ ប្រទេសតូចក្នុងតំបន់អាហ្វ្រិកភាគខាងលិច ហ្គំប៊ី បានចោទ រដ្ឋាភិបាលប្រទេសមីយ៉ាន់ម៉ាថា បានប្រព្រឹត្តអំពើហិង្សាប្រល័យពូជសាសន៍ ប្រឆាំងសហគមន៍ជនជាតិភាគតិចរ៉ូហ៊ីងយ៉ា ដោយការសម្លាប់រង្គាល,ចាប់រំលោភ និងទម្រង់ផ្សេងទៀតនៃហិង្សាផ្លូវភេទ ក៏ដូចជា ការដុតបំផ្លាញផ្ទះសម្បែងរបស់អ្នកភូមិ រ៉ូហ៊ីងយ៉ា ។ អង្គសវនាការជាប្រវត្តិសាស្ត្រនេះ ប្រព្រឹត្តទៅរយៈពេល៣ថ្ងៃ ។
ការសម្រេចចិត្តទៅតតាំងក្តីនៅតុលាការឡាអេ របស់លោកស្រី ស៊ូជី បង្កភាពភ្ញាក់ផ្អើលជាខ្លាំង ទាំងអ្នករស់នៅក្នុងប្រទេសមីយ៉ាន់ម៉ា និងសហគមន៍អន្តរជាតិ ។ ប្រសិនបើលទ្ធផលនៅតុលាការឡាអេ មានអ្វីថ្លោះធ្លោយនោះ ផលវិបាកធ្ងន់ធ្ងរនឹងធ្លាក់លើរូបលោកស្រី ដោយវានឹងបំផ្លាញកេរ្តិ៍ឈ្មោះលោកស្រីលើឆាកអន្តរជាតិខ្លាំងបន្ថែមទៀត ដែលលោកស្រីកំពុងតែមានឈ្មោះមិនសូវល្អផងនោះ ។
យោងការចេញផ្សាយរបស់គេហទំព័រ wikipediaបានបញ្ជាក់ថា ចាប់ពីថ្ងៃទី៩ ខែតុលា ឆ្នាំ២០១៦រហូតដល់ខែមករា ឆ្នាំ២០១៧ មានអំពើធ្វើទុក្ខបុកម្នេញទៅលើជនជាតិមូស្លីមរ៉ូហ៊ីងយ៉ា ស្ថិតនៅក្នុងរដ្ឋ រ៉ាឃីន ប្រទេសមីយ៉ាន់ម៉ា ។ ប៉ូលិស យោធាប្រដាប់ដោយអាវុធរបស់មីយ៉ានម៉ាបានប្រតិបត្តិការបោសសម្អាតជនជាតិភាគតិចមូស្លីមរ៉ូហ៊ីងយ៉ាបណ្តាលឲ្យស្លាប់ជាងរាបម៉ឺននាក់ និងបង្ខំឲ្យភៀសខ្លួនរាប់សែននាក់ទៅកាន់ប្រទេសបង់ក្លាដែស ៕
