សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនសង្ស័យប្រុសស្រី៤នាក់ត្រូវបានសមត្ថកិច្ចកងរាជអាវុធហត្ថចុះបង្ក្រាបឃាត់ខ្លួនពាក់ពន្ធ័នឹងករណីរក្សាទុក ឬជួញដូរដោយខុសច្បាប់នូវសារធាតុញៀន ។
ការចុះបង្ក្រាបនេះ បានធ្វើឡើងកាលពីវេលាម៉ោង៥ និង២០នាទីល្ងាច ថ្ងៃទី១១ ខែធ្នូ ឆ្នាំ២០១៩ នៅចំណុចបន្ទប់ជួលស្ថិតនៅភូមិថ្នាញ សង្កាត់បាទី ក្រុងបាវិត ខេត្តស្វាយរៀង ។
យោងតាមសមត្ថកិច្ចកងរាជអាវុធហត្ថខេត្តស្វាយរៀងបានឲ្យដឹងថា ជនសង្ស័យដែលឃាត់ខ្លួនមានឈ្មោះ សួស ឧត្តម ភេទប្រុស អាយុ១៩ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិថ្មីឃុំអណ្ដូងពោធិ ស្រុករមាសហែក ខេត្តស្វាយរៀង, ទី២ឈ្មោះ មាស ថុនា ភេទប្រុស អាយុ២០ឆ្នាំជនជាតិខ្មែរ មុខរបរមិនពិតប្រាកដ ស្រុកកំណើត ភូមិបុស្សគគីរ ឃុំអណ្ដូងពោធិ ស្រុករមាសហែក ខេត្តស្វាយរៀង, ទី៣មាន ឈ្មោះ អ៊ុច សាទ្រា ភេទប្រុស អាយុ១៩ឆ្នាំជនជាតិខ្មែរ មុរបរមិនពិតប្រាកដ បច្ចុប្បន្ននៅភូមិព្រៃគគីរ ឃុំព្រៃគគីរ ស្រុកចន្រ្ទា ខេត្តស្វាយរៀង និងទី៤មានឈ្មោះ អ៊ុត ខ្នា ភេទស្រី អាយុ១៩ឆ្នាំ ជនជាតិខ្មែរ មុខរបរបុគ្គលិកកាស៊ីណូ ស្រុកកំណើតភូមិកំពង់អំពិល ឃុំកំពង់អំពិល ស្រុករំដួល ខេត្តស្វាយរៀង ។
ប្រភពបន្តថា ក្រោយឃាត់ខ្លួនសមត្ថកិច្ចរឹបអូសយកវត្ថុតាងរួមមាន ៖ ម្សៅក្រាមពណ៌សថ្លា ចំនួន ០៦ កញ្ចប់ (ធំ០២កញ្ចប់ តូច០៤កញ្ចប់) ម៉ូតូចំនួន០១គ្រឿង ម៉ាកវ៉េ ពណ៌ខ្មៅពាក់ស្លាកលេខស្វាយរៀង 1N 7347 ទូរសព្ទដៃចំនួន០៣គ្រឿង ប្រាក់រៀលចំនួន ២០០.០០០រៀល ប្រាក់ដុងចំនួន ២០០.០០០ ដុង អត្តសញ្ញាណប័ណ្ណចំនួន ០២ សន្លឹក ដាវសាំម៉ូរ៉ៃចំនួន ០៣ ដើម កូនកាំបិតចុងស្រួចចំនួន០១ សម្ភារប្រើប្រាស់គ្រឿងញៀនមួយចំនួន ។
ប្រភពបន្តថា កម្លាំងជំនាញមន្ទីរយុត្តិធម៌ កងរាជអាវុធហត្ថខេត្តស្វាយរៀង សហការជាមួយកម្លាំងមូលដ្ឋាន កងរាជអាវុធហត្ថក្រុងបាវិត ដឹកនាំដោយលោក វរសេនីយ៍ឯក ស្រី វុត្ថា មេបញ្ជាការរង កងរាជអាវុធហត្ថខេត្ត ក្រោមបទបញ្ជាផ្ទាល់របស់ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានចុះប្រតិបត្តិការបង្រ្កាបករណីរក្សាទុក ឬជួញដូរដោយខុសច្បាប់នូវសារធាតុញៀន នៅចំណុចបន្ទប់ជួលស្ថិតនៅភូមិថ្នាញ សង្កាត់បាទី ក្រុងបាវិត ខេត្តស្វាយរៀង ដោយឃាត់ខ្លួនជនសង្ស័យប្រុសស្រីបានចំនួន៤នាក់ មកសាកសួរផងដែរ ។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងសមត្ថកិច្ចកសាងសំណុំរឿង បញ្ជូនទៅតុលាការចាត់ការបន្តតាមច្បាប់ ៕ យឹម សុថាន
