សារព័ត៌មាន នគរវត្ត តែងតែនាំមុខគេជានិច្ច
ការផ្ទុះភ្នំភ្លើងនៅលើកោះស របស់ New Zealand បានសម្លាប់មនុស្ស រហូតដល់ទៅ១៦នាក់ និងរាប់សិបនាក់ផ្សេងទៀត រងរបួស។ នៅពេលនេះ ក្រុមជំនាញ់កំពុងតែ ព្យាយាមយកសាកសព៦នាក់ ដែលនៅជិតទីតាំងផ្ទុះភ្នំភ្លើង។
ក្រុមទាហានពិសេស របស់ New Zealand បានសម្រេចទៅដឹកជញ្ជូនសាកសព៦នាក់ ចេញពីភ្នំភ្លើង នៅលើកោះស នៅថ្ងៃទី១៣ ខែធ្នូ ។ សកម្មភាពដឹកជញ្ជូននេះ គឺមានគ្រោះថ្នាក់យ៉ាងខ្លាំង ដោយក្រុមដឹកជញ្ជូនត្រូវប្រឈមនឹងការផ្ទុះភ្នំភ្លើងថ្មីទៀត។
ឧទ្ធម្ភាគចក្រយោធាពីរគ្រឿង បានចាកចេញពីអាកាសយានដ្ឋាន Whakatane នៅព្រឹក ថ្ងៃទី១៣ ខែធ្នូ ទៅកាន់កំពូលភ្នំភ្លើងនៅលើកោះស ដែលបានផ្ទុះ តាំងពីថ្ងៃទី២ ខែធ្នូ។ គោលដៅទៅកាន់ទីនោះ គឹបញ្ជូនសាកសព៦នាក់ ចេញពីភ្នំភ្លើង។
សារព័ត៌មាន AFP បានផ្សាយថា កម្លាំងទាហានពិសេសរបស់ញូវហ្ស៊ីឡែន ៨នាក់ បានបញ្ជូនទៅកាន់ទីតាំងភ្នំភ្លើង កំពុងព្រួសកម្អែ យ៉ាងខ្លាំង ដើម្បីទទួលសាកសព ពីតំបន់ភ្នំភ្លើងដ៏គ្រោះថ្នាក់។ ក្រោយរយៈពេលជាងកន្លះម៉ោង ធ្វើការយ៉ាងសកម្ម កម្លាំងទាហានបានបញ្ជូនសាកសពឡើងមកលើនាវាចម្បាំង HMNZS Wellington នៅក្បែរកោះនោះ។
យន្តហោះគ្មានមនុស្សបើក បានរកឃើញទីតាំងសាកសពរបស់ជនរងគ្រោះទាំង៦នាក់។ សកម្មភាព«រំដោះសាកសព» បានកើតឡើង ក្នុងពេលដែលភាគរយ នៃការផ្ទុះភ្នំភ្លើងជាថ្មី មានរហូតដល់៦០ភាគរយ ដែលជារឿងដ៏គ្រោះថ្នាក់បំផុត។
នាយករដ្ឋមន្ត្រីញូវហ្ស៊ីឡែន លោកស្រី Jacinda Ardern បានតាមដានយ៉ាងយកចិត្តទុកដាក់នូវសកម្មភាពរបស់កម្លាំងទាហានពិសេស ទៅដឹកសាកសព។ លោកស្រីបន្តទៀតថា សកម្មភាពរបស់ទាហាន គឺត្រូវ ដឹកជញ្ជូនសាកសពមកផ្ទះ ប្រគល់ឲ្យសាច់ញាតិ៕
