សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ប្តីប្រពន្ធ២នាក់ ស្លាប់ក្នុងថ្លុកឈាមយ៉ាងអាណោចអាធ័ម ខណៈបើកម៉ូតូឌុបគ្នាឆ្លងផ្លូវ ស្រាប់តែមានរថយន្តមួយគ្រឿងបើកដោយល្បឿនលឿន ក៏បុកពេញមួយទំហឹង កាលពីវេលាម៉ោង១៨និង១០នាទី ថ្ងៃទី១៣ ខែធ្នូ ឆ្នាំ២០១៩ នៅលើកំណាត់ផ្លូវជាតិលេខ២១ ចំណុចគល់ស្ពានព្រែកក្បាលកោះទៀវ ( ទី៦៤ ) ត្រើយខាងជើង ស្ថិតនៅក្នុងភូមិក្បាលកោះទៀវ ឃុំសំពៅពូន ស្រុកកោះធំ ខេត្តកណ្តាល ។
មន្ត្រីនគរបាលចរាចរណ៍ស្រុកកោះធំបានឲ្យដឹងថា ជនរងគ្រោះស្លាប់២នាក់ទី១/ឈ្មោះ ហុី យ៉ុង ភេទប្រុស អាយុ៥៤ឆ្នាំ មុខរបរ កសិករ ជាអ្នកបើកបរម៉ូតូម៉ាកហុងដាគុបមូល ធុនសេ៩០ ពណ៌ខៀវចាស់ អត់ស្លាកលេខ និងទី២/ឈ្មោះ ទឹម រិន ភេទស្រី អាយុ៥៧ឆ្នាំ មុខរបរ កសិករ ត្រូវជាប្រពន្ធ (រួមដំណើរជាមួយ)។ ចំណែករថយន្តម៉ាកហុីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3 A_2523 បើកបរដោយជនមិនស្គាល់អត្តសញ្ញាណ រត់គេចខ្លួនបាត់ស្រមោល ។
ប្រភពដដែលបន្តថា នៅមុនកើតហេតុ សាក្សីបានឃើញជនរងគ្រោះប្តីប្រពន្ធ២នាក់បានជិះម៉ូតូឌុបគ្នាតាមបណ្ដោយផ្លូវជាតិលេខ២១ក្នុងទិសដៅពីត្បូងទៅជើង លុះជិះមកដល់ចំណុចកើតហេតុ ក៏បត់ឆ្លងផ្លូវដោយពុំមើលមុខមើលក្រោយទេ ខណៈនោះក៏មានរថយន្តមួយគ្រឿងបើកដោយល្បឿនលឿន បានបុកជាមួយម៉ូតូជនរងគ្រោះពេញមួយទំហឹង បណ្ដាលឲ្យជនរងគ្រោះទាំង២នាក់ប្តីប្រពន្ធស្លាប់ភ្លាមៗនៅកន្លែងកើតហេតុ ។ ចំណែកអ្នកបើកបររថយន្តបានទុករថយន្តចោល រួចរត់គេចខ្លួនបាត់ស្រមោល ។
ក្រោយពីមានហេតុការណ៍កើតឡើង សមត្ថកិច្ចបានចុះពិនិត្យ វាស់វែងកន្លែងកើតហេតុ រួចកសាងសឯកសារយកមធ្យោបាយពាក់ព័ន្ធទាំង២គ្រឿងយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។ ចំណែកសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យគ្រួសារសាច់ញាតិយកទៅចាត់ចែងធ្វើបុណ្យតាមប្រពៃណី ៕ ស្អាងជ័យ
