សារព័ត៌មាន នគរវត្ត តែងតែនាំមុខគេជានិច្ច
កាលពីមុន ពេលអាមេរិកដាក់ទណ្ឌកម្មជាប៉ុនគឺជាប្រទេសទិញប្រេងពីអ៊ីរ៉ង់ ឈរលំដាប់លេខមួយ ។ ទំនាក់ទំនងប្រទេសទាំងពីរ មានភាពល្អប្រសើរ ដដែល បើទោះបីពេលនេះ ជប៉ុនឈប់ទិញប្រេងពីអ៊ីរ៉ង់ដោយសារតែ ទណ្ឌកម្មអាមេរិក ។
ប្រធានាធិបតីអ៊ីរ៉ង់ លោក ហាសសាន រ៉ូហានី បានត្រៀមលក្ខណៈទៅបំពេញទស្សនកិច្ចជាលើកដំបូង នៅប្រទេសជប៉ុន។ ដំណើរទស្សនកិច្ចរបស់លោក រ៉ូហានី បានកើតឡើង ចំពេលអ៊ីរ៉ង់កំពុងតែរងការដាក់គំនាប ពីអាមេរិក និងសម្ពន្ធមិត្ត។
សារព័ត៌មានជាតិអ៊ីរ៉ង់ IRNA បានដកស្រងការប្រកាសរបស់រដ្ឋលេខាធិការក្រសួងការបរទេសអ៊ីរ៉ង់ លោក Abbas Araghchi បានឲ្យដឹងថា ប្រធានាធិបតី រ៉ូហានី នឹងទៅកាន់ទីក្រុងតូក្យូ ប្រទេសជប៉ុន នៅថ្ងៃទី២០ ខែធ្នូ ខាងមុខនេះ។ ប៉ុន្ដែដំណើរទស្សនកិច្ចនោះ មានតែរយៈពេលមួយថ្ងៃប៉ុណ្ណោះ ។
ក្រុមអ្នកឯកទេសវិភាគ បានលើកឡើងថា ដំណើរទស្សនកិច្ចរបស់ប្រធានាធិបតីអ៊ីរ៉ង់ ក្នុងគោលដៅ បំបែកការឡោមព័ទ្ធ ពីអាមេរិក និងសម្ពន្ធមិត្ត ក្រោយពេលអាមេរិក ដកខ្លួនចេញពីកិច្ចព្រមព្រៀង បរមាណូ ហើយបង្កើនការដាក់ទណ្ឌកម្មទៅលើប្រទេសអ៊ីរ៉ង់។
អ្នកនាំពាក្យរដ្ឋាភិបាល អ៊ីរ៉ង់ បានលើកឡើងថា គោលដៅនៃដំណើរទស្សនកិច្ចរបស់ប្រធានាធិបតីទៅកាន់ប្រទេសជប៉ុន គឺដើម្បីពិភាក្សា ស្តីពីទំនាក់ទំនងសេដ្ឋកិច្ច ។ កាលពីខែមិថុនា ឆ្នាំ២០១៩ នាយករដ្ឋមន្ត្រីជប៉ុន លោកអាបេ ក៏បានទៅបំពេញទស្សនកិច្ច នៅក្នុងបរទេសអ៊ីរ៉ង់ ដើម្បីពិភាក្សាបញ្ចប់ការប្រឈមមុខដាក់គ្នា រវាងអាមេរិក និងអ៊ីរ៉ង់ នៅក្នុងតំបន់ឈូងសមុទ្រ ។
ជាមួយគ្នានេះដែរ នាយករដ្ឋមន្ត្រីជប៉ុន លោកអាបេ ក៏មានទំនាក់ទំនងល្អទាំងជាមួយអាមេរិក និងអ៊ីរ៉ង់ ហើយលោកនឹងខិតខំជួយកាត់បន្ថយភាពតានតឹង រវាងប្រទេសទាំងពីរ ។ កន្លងមក ជប៉ុនគឺជាអតិថិជន ធំបំផុត សម្រាប់ទិញប្រេងពីអ៊ីរ៉ង់ ប៉ុន្តែជប៉ុនបានផ្អាកវិញ ដោយសារតែច្បាប់ទណ្ឌកម្មរបស់អាមេរិក៕
