សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន២នាក់ បានជិះម៉ូតូមួយគ្រឿងឌុបគ្នាធ្វើសកម្មភាពឆក់ទូរស័ព្ទដៃពីនារីម្នាក់បានសម្រេច កាលពីវេលាម៉ោង៨យប់ ថ្ងៃទី២៣ ខែធ្នូ ឆ្នាំ២០១៩ នៅចំណុចផ្លូវលេខ២៧៨ កែងផ្លូវលេខ១១១ ស្ថិតក្នុងសង្កាត់បឹងកេងកងទី២ ខណ្ឌបឹងកេងកង ហើយព្យាយាមជិះគេចខ្លួន ត្រូវជនរងគ្រោះដេញតាមក្រោយរហូតទៅដល់ផ្លូវលេខ១៤៣ កែងផ្លូវព្រះសីហនុ ស្ថិតក្នុងសង្កាត់អូឡាំពិក ខណ្ឌបឹងកេងកង ទើបប្រជាពលរដ្ឋឃាត់ជាប់ម្នាក់ ចំណែកម្នាក់ទៀតគេចខ្លួនបាត់ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញនារីរងគ្រោះជិះម៉ូតូ ម៉ាក វេវ ពណ៌ខ្មៅ ពាក់ស្លាកលេខ ភ្នំពេញ 1GA 7893 ធ្វើដំណើរតាមបណ្តោយផ្លូវលេខ១១១ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានជនសង្ស័យចំនួន២នាក់ជិះម៉ូតូស្មាស់មិនចាំស្លាកលេខមកពីក្រោយធ្វើសកម្មភាពឆក់ទូរស័ព្ទដៃម៉ាក opoF5 បានសម្រេចហើយធ្វើយាមជិះម៉ូតូរត់ភ្លាមនោះ ជនរងគ្រោះក៏បានស្រែកថា ចោរដេញតាមក្រោយរហូតទៅដល់ផ្លូវព្រះសីហនុ កែងផ្លូវ១៤៣ទើបឃាត់បានម្នាក់ចំណែកម្នាក់ទៀតគេចខ្លួនបាត់ ។
ក្រោយកើតហេតុជនសង្ស័យត្រូវបានបញ្ជូនទៅប៉ុស្តិ៍នគរបាលរដ្ឋបាលបឹងកេងកងទី២ដើម្បីសួរនាំ និងស្រាវជ្រាវតាមចាប់បក្ខពួកបន្តទៀត ៕ សុខាសែនជ័យ
