សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងមន្ទីរប្រឆាំងគ្រឿងញៀននៃការិយាល័យក៦បានប្រដេញជនសង្ស័យម្នាក់ជាអ្នកចែកចាយគ្រឿងញៀន ខណៈកំពុងចែកចាយគ្រឿងញៀន និងមានការផ្ទុះអាវុធទៅវិញទៅមកជាច្រើនគ្រាប់ ទើបបង្ក្រាបបានជនសង្ស័យចំនួន២នាក់ ដកហូតម៉ូតូមួយគ្រឿង និងកាំភ្លើងខ្លីមួយដើម ។
ប្រតិបត្តិការនេះ បានធ្វើឡើងកាកពីវេលាម៉ោង១០ និង៤០នាទីយប់ ថ្ងៃទី២៣ ខែធ្នូ ឆ្នាំ២០១៩ នៅផ្ទះលេខ៩០ ផ្លូវ៣១៥ ក្រុម៩០ ភូមិ៧ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ជនសង្ស័យទី ១-ឈ្មោះ មាស សិលា ហៅសីលា ភេទប្រុស អាយុ២៧ឆ្នាំ ជនជាតិខ្មែរ មុខរបរអ្នកបើកបរ រថយន្តស្នាក់នៅផ្ទះដីឡូត៍លេខ៩០ ផ្លូវលេខ៣១៥ ក្រុមទី៣៣ ភូមិ៧ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ២-ឈ្មោះគិត ម៉េងលី ហៅ លី ភេទប្រុស អាយុ១៨ឆ្នាំ ជនជាតិខ្មែរមុខរបរនិស្សិត ស្នាក់នៅផ្ទះដីឡូត៍លេខ៩០ ផ្លូវលេខ៣១៥ ក្រុមទី៣៣ ភូមិ៧ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
តាមសមត្ថកិច្ចបានឲ្យដឹងថា មុនពេលឃាត់ខ្លួនជនសង្ស័យខាងលើកម្លាំងបានតាមដានជាយូរមកហើយលុះ នៅយប់កើតហេតុទើបតាមដានពីក្រោយជនសង្ស័យនៅម្តុំស្ពានអាកាសក្បាលថ្នល់ពេលនោះជនសង្ស័យ ក៏បានជិះម៉ូតូរហូតទៅដល់ស្តុបផ្សារមាន់អាំងដើម្បីចែកចាយគ្រឿងញៀនភ្លាមនោះ កម្លាំងនគរបាលក៏បានប្រដេញតាមរហូតជនសង្ស័យជិះចូលផ្ទះ និងបានបាញ់ទៅលើសមត្ថកិច្ចជាចំនួន៤គ្រាប់ ទើបសមត្ថកិច្ចបាញ់រំដោះខ្លួនចំនួន១គ្រាប់វិញ ។
សមត្ថកិច្ចបានបន្តថា ពេលនោះកម្លាំងនគរបាលឡោមព័ទ្ធ និងសម្រុកចូលចាប់ជនសង្ស័យបានចំនួន២នាក់ និងដកហូត អាវុធខ្លីមួយដើមម៉ាក SIGSOWER P320 រួមទាំងម៉ូតូមួយគ្រឿងម៉ាក ហុងដាឌ្រីមសង់ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ1GD 4729 ផងដែរ ។
ក្រោយឃាត់ខ្លួនជនសង្ស័យត្រូវបានបញ្ជូនទៅអធិការនគរបាលខណ្ឌទួលគោក ដើម្បីកសាងសំណុំរឿងបញ្ជូនទៅមន្ទីរប្រឆាំងការជួយដូរគ្រឿងញៀនដើម្បីចាត់ការតាមច្បាប់ ៕ សុខាសែនជ័យ
