សារព័ត៌មាន នគរវត្ត តែងតែនាំមុខគេជានិច្ច
សំណាងអ៊ីស្រាអែលមានប្រព័ន្ធមីស៊ីលការពារទំនើប អាចទប់ស្កាត់ការវាយប្រហារបានទាន់ពេលវេលា កុំអី នាយករដ្ឋមន្ត្រីអ៊ីស្រាអែល ណេតាន់ យ៉ាហូ ត្រូវរ៉ុក្កែតពីកាហ្សាសម្លាប់ជាមិនខាន។
រ៉ុក្កែតបាញ់ចេញពីកាហ្សា សំដៅទៅកាន់ទីតាំងនាយករដ្ឋមន្ត្រីអ៊ីស្រាអែល ណេតាន់យ៉ាហូ កំពុងចូលរួមក្នុងព្រឹត្តិការណ៍ នៅទីក្រុង Ashkelon នៅថ្ងៃទី២៦ ខែធ្នូនេះ។ ប៉ុន្ដែនេះជាភ័ព្វសំណាងណាស់ ដោយសារប្រព័ន្ធការពារដែនអាកាសអ៊ីស្រាអែល Iron Dome ចាប់បានរ៉ុក្កែត ដែលកំពុងហោះហើរសំដៅ ក៏បានប្រកាសអាសន្ន ហើយវាយស្ទាក់កម្ទេចរ៉ុក្កែតនោះ ដោយជោគជ័យ។
ដោយឡែកនាយករដ្ឋមន្ត្រីអ៊ីស្រាអែល ក៏បានផ្អាកសកម្មភាព ហើយស្វែងរកកន្លែងលាក់ខ្លួនដោយសុវត្ថិភាពផងដែរ ដោយសារខ្លាចមានរ៉ុក្កែត បាញ់ប្រហារជាបន្តបន្ទាប់មកកាន់អ៊ីស្រាអែល ដូចកាលពីមុន។ ប្រព័ន្ធការពារដែនអាកាសអ៊ីស្រាអែល អាចទប់ស្កាត់បាន តែការវាយប្រហារទោលតែប៉ុណ្ណោះ ប្រសិនបើក្រុមឧទ្ទាម បើកការវាយប្រហារ តាមបែប«ព្យុះរ៉ុក្កែត» គឺមិនអាចទប់ស្កាត់បានទាំងស្រុងនោះឡើយ។
ក្នុងពេលដែលក្រុមឧទ្ទាមវាយប្រហារដោយរ៉ុក្កែត នាយករដ្ឋមន្ត្រី ណេតាន់យ៉ាហ៊ូ កំពុងតែថ្លែងសុន្ទរកថាទៅកាន់ប្រជាពលរដ្ឋ។ នៅពេលនោះ ប្រព័ន្ធប្រកាសអាសន្ន ក៏បានបន្លឺឡើង ហើយនាយករដ្ឋមន្ត្រី ក៏បានផ្អាករាល់សកម្មភាពរកកន្លែងលាក់ខ្លួន ជាមួយមន្ត្រីសំខាន់ៗ។
នេះជាលើកទីពីរហើយដែលសកម្មភាពនយោបាយរបស់នាយករដ្ឋមន្ត្រី ណេតាន់យ៉ាហ៊ូ រងផលប៉ះពាល់ដោយការវាយប្រហារពីក្រុងឧទ្ទាម នៅកាហ្សា។ កាលពីខែកញ្ញាកន្លងមក នាយករដ្ឋមន្ត្រី អ៊ីស្រាអែល បានចាកចេញពីពិធីប្រគំតន្ត្រី ក្រោយប្រព័ន្ធប្រព័ន្ធប្រកាសអាសន្នបានបន្លឺឡើង ពេលមានរ៉ុក្កែតបាញ់សម្តៅទៅកាន់ទីក្រុង Ashdod ៕
