សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានការភ្ញាក់ផ្អើលមួយបានកើតឡើង ខណៈប្រជាពលរដ្ឋបានប្រទះឃើញបុរសម្នាក់បានដេកស្លាប់ក្នុងថ្លុកឈាមតាមចិញ្ចើមផ្លូវសង្ស័យជាករណីឃាតកម្ម (យកវត្ថុរឹងវាយបណ្តាលឲ្យស្លាប់) ។ ហេតុការណ៍នេះ បានកើតកាលពីវេលាម៉ោង០៦ និង០០នាទី ថ្ងៃទី៣០ ខែធ្នូ ឆ្នាំ២០១៩ ស្ថិតនៅត្រង់ចំណុចមុខហាងនាគក្រហម ផ្លូវបេតុង ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
នគរបាលមូលដ្ឋានខណ្ឌសែនសុខបានឲ្យដឹងថា៖ ជនរងគ្រោះមាន ឈ្មោះ ជា គឹមហេង ភេទប្រុស អាយុ៣២ឆ្នាំ ជនជាតិខ្មែរ មុខរបរគ្មាន ស្នាក់នៅមិនពិតប្រាកដ (ស្លាប់) ។ ចំណែកជនសង្ស័យមិនស្គាល់អត្តសញ្ញាណទេ ។
ប្រភពពីសមត្ថកិច្ចបានឲ្យដឹងទៀតថាមុនពេលកើតហេតុមានប្រជាពលរដ្ឋបានឃើញជនរងគ្រោះរងរបួសធ្ងន់ដោយមានឈាមពេញខ្លួនហើយក៍រាយការមកនគរបាលប៉ុស្តិ៍អូរបែកក្អមចុះទៅពិនិត្យភ្លាមៗក្រោយមកសមត្ថកិច្ចបានដឹកជនរងគ្រោះទៅមន្ទីពេទ្យប៉ុន្តែដោយរបួសធ្ងន់ធ្ងរពេកទើបដាច់ខ្យល់ស្លាប់នៅមន្ទីពេទ្យតែម្តង ។ ក្រោយមកសពត្រូវសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
កម្លាំងអធិការដ្ឋាននគរបាលខណ្ឌសែនសុខកំពុងស្រាវជ្រាវករណីខាងនេះយ៉ាងយកចិត្តទុកដាក់ដើម្បីតាមចាប់ខ្លួនជនដៃដល់យកមកផ្តាន់ទារទោសតាមផ្លូវច្បាប់ ៕ ចាន់ លីហ្សា
