សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ម្ចាស់សណ្ឋាគារ និងភោជនីយដ្ឋានធំៗក្នុងក្រុងសៀមរាប បានសម្រេចចិត្តប្រកាសបិទទ្វារ និងខ្លះទៀតដាក់ជួលក៏មាន បន្ទាប់ពីគេដឹងថា កន្លងមកនេះភ្ញៀវទេសចនៅខេត្តសៀមរាបរហាក់ធ្លាក់ចុះយ៉ាងខ្លាំង។ ប្រភពព័ត៌មានពីខេត្តសៀមរាបបានឲ្យដឹងថា នៅថ្ងៃទី១ មករា ឆ្នាំ២០២០ នេះ សណ្ឋាគារអប្សរាអង្គរ ដែលមានភាពល្បីល្បាញពីមុនមក បានប្រកាសពីការបិទធ្វើអាជីវកម្មរបស់ខ្លួនដែរធ្វើឲ្យប្រតិបត្តិករទេសចរណ៍ខេត្តសៀម មានការសោកស្ដាយ និងបង្ហាញក្តីបារម្ភថា «សណ្ឋាគារផ្សេងទៀត ក៏អាចប្រឈមមុខដូចគ្នានេះ ប្រសិនបើស្ថានភាពបែបនេះ មិនមានការវិវត្តថ្មី»។
អ្នកគ្រប់គ្រងសណ្ឋាគារអប្សរាអង្គរ បានប្រកាសជាសាធារណៈក្នុងបណ្ដាញសង្គមហ្វេសប៊ុក ពីព័ត៌មាននៃការបិទអាជីវកម្មសណ្ឋាគារនេះ បន្ទាប់ពីមានវត្តមាននៅលើទឹកដីអង្គរជិត១៨ឆ្នាំមកហើយនោះ ។ ព័ត៌មាននេះ បានបង្កឱ្យមានការភ្ញាក់ផ្អើលមួយទៀត បន្ទាប់ពីអតីតសណ្ឋាគារ Inter-continental (The Great Duke) នៅរាជធានីភ្នំពេញ បានប្រកាសបិទទ្វារ នៅថ្ងៃទី៣១ ធ្នូឆ្នាំ២០១៩ ថ្មីៗនេះ។ ក្រៅពីបានប្រកាសជាសាធារណៈក្នុងបណ្ដាញសង្គមហ្វេសប៊ុក ភ្នាក់ងារកាសែតនគរវត្តមិនអាចសុំការបញ្ជាក់ ពីអ្នកគ្រប់គ្រងសណ្ឋាគារអប្សរាអង្គរបានទេ ជុំវិញមូលហេតុដែលនាំឱ្យមានការបិទអាជីវកម្មនៃសណ្ឋាគារមួយនេះ។
យ៉ាងណាម្ចាស់សណ្ឋាគារមួយនៅខេត្តសៀមរាប ដែលសុំមិនបញ្ចេញឈ្មោះ បានប្រាប់ឲ្យដឹងនៅរសៀលថ្ងៃទី២ មករាឆ្នាំ២០២០នេះថា ជាទូទៅ ការរកស៊ីពេលណានៅបន្តបាននោះ គេនឹងបន្ត ព្រោះថាសណ្ឋាគារអប្សរាអង្គរនេះ បានរកស៊ីច្រើនឆ្នាំមកហើយ ប៉ុន្តែដល់កម្រិតដែលខាត មិនចំណេញ ឬទប់លែងបាន នោះអ្នករកស៊ី មិនខ្លាចនឹងការបិទទ្វារឡើយ។ លោក មិនបានដឹងព័ត៌មានច្បាស់លាស់ ពីចំនួនសណ្ឋាគារក្នុងក្រុងសៀមរាម ដែលបានបិទអាជីវកម្មនោះទេ តែលោកប្រាប់ថា លោក សង្កេតឃើញមាន «សណ្ឋាគារច្រើនកន្លែង បានដាក់ស្លាកលក់ឬជួល ជាបន្តបន្ទាប់នារយៈពេលចុងក្រោយនេះ»។
ម្ចាស់សណ្ឍាគារមួយនេះបានពន្យល់ថា ស្ថានភាពបែបនេះ អាចនឹងធ្វើឱ្យសណ្ឋាគារផ្សេងទៀត ប្រឈមមុខនឹងការបិទអាជីវកម្មដូចគ្នា ប្រសិនបើគ្មានដំណោះស្រាយ ឬបរិយាកាសវិស័យនេះមិនមានការវិវត្តថ្មី។ លោកថា៖«គ្មានអ្នកណាចង់បិទអាជីវកម្មខ្លួនទេ តែបើខាតមិនចំណេញ ទប់លែងកើត គ្មានអ្នកណានៅបន្តធ្វើទេ»។ចំណែក អ្នកគ្រប់គ្រងនៅសណ្ឋាគារមួយទៀត ដែលសុំមិនបញ្ចេញឈ្មោះដែរនោះ ក៏បានបង្ហាញការសោកស្ដាយដែរ ចំពោះព័ត៌មាននៃការបិទសណ្ឋាគារអប្សរាអង្គរ តែខ្លួនយល់ថា បញ្ហានេះ មិនមែនកើតឡើងតែនៅកម្ពុជាទេ។
ជាការកត់សម្គាល់ប្រទេសនៅអាស៊ីមួយចំនួន មានថៃ និងវៀតណាម ជាដើម បានពើបប្រទះការធ្លាក់ចុះចំនួនអ្នកទេសចរដូចគ្នា តែដោយសារប្រទេសទាំងនោះមានអ្នកទេសចរច្រើន ទើបការធ្លាក់នេះមិនសូវចោទខ្លាំង។ រីឯការប្រកាសបិទសណ្ឋាគារអប្សរាអង្គរនេះ អាចទាក់ទងនឹងផ្នែកទីផ្សាររបស់សណ្ឋាគារនេះខ្លួនឯងព្រោះ កន្លងមកសណ្ឋាគារ ដែលមានជាង១០០បន្ទប់នេះ ផ្តោតគោលដៅធំ លើការរៀបចំកិច្ចប្រជុំស្ថាប័នរាជរដ្ឋាភិបាល អង្គការធំៗ តែក្រោយមកមានសណ្ឋាគារថ្មីចូលខ្លួនមកជំនួស ទើបបណ្ដាលឱ្យអាជីវកម្មសណ្ឋាគារនេះគ្មានទីផ្សារធ្លាក់ចុះនៃភ្ញៀវទេសចរ ៕ ប្រាថ្នា
