ចោរខ្ទើយថ្លើមធំ ហ៊ានចូលលួចថេបឡេតដល់ក្នុងផ្ទះ ត្រូវម្ចាស់ឃើញទាន់ស្រែកឆោឡោផ្អើលសមត្ថកិច្ចចាប់ខ្លួន

ភ្នំពេញ៖ កម្លាំងនគរបាលប៉ុស្តិ៍ជ័យជំនះ បានចាប់ខ្លួនចោរខ្ទើយ ប្រុសចរិកស្រីម្នាក់ ក្រោយធ្វើសកម្មភាពលួចទ្រព្យសម្បត្តិ បុរសជនជាតិបរទេសម្នាក់ ដល់ក្នុងផ្ទះភ្លាមនោះជនរងគ្រោះឃើញទាន់ស្រែកឆោឡោផ្អើលដល់សមត្ថកិច្ចមូលដ្ឋាន ជួយធ្វើអន្តរាគមន៍ចាប់ឃាត់ខ្លួនភ្លាមៗ ។

ការចាប់ខ្លួនចោរលួចខាងលើនេះ បានកើតឡើងកាលពីវេលាម៉ោង១ និង៤០នាទីរំលងអធ្រាត្រ ឈានចូលថ្ងៃទី៣ ខែមករា ឆ្នាំ២០២០ នៅចំណុចផ្ទះលេខ២០៩ ផ្លូវលេខ១៩ ភូមិ១០ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។

ជនសង្ស័យត្រូវឃាត់ខ្លួននោះ ឈ្មោះ អឿន ម៉ៅ ភេទប្រុស(ភេទទី៣)អាយុ២២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅមិនពិតប្រាកដ ។ រីវត្ថុតាងចាប់យកបានថេបឡេត០១គ្រឿង ម៉ាកសាំស៊ុង ពណ៌ទឹកប្រាក់ ជារបស់ជនរងគ្រោះ ។ ចំណែកជនរងគ្រោះ ឈ្មោះ CALLUM IAIN MECULLOEM ភេទប្រុស អាយុ៤៨ឆ្នាំ ជនជាតិអូស្ត្រាលី មុខរបរបុគ្គលិកក្រុមហ៊ុន មានទីលំនៅផ្ទះលេខ២០៩ ផ្លូវលេខ១៩ សង្កាត់ជ័យជំនះ ខណ្ឌដូនពេញ រាជធានីភ្នំពេញ កាន់លិខិតឆ្លងដែនលេខPA6076550 ។

តាមប្រភពព័ត៍មានពីនគរបាលខណ្ឌដូនពេញ បានឲ្យដឹងថា មុនពេលកើតហេតុ កាលពីវេលាម៉ោង១ និង៤០នាទីរំលងអធ្រាត្រ ឈានចូលថ្ងៃទី០៣ ខែមករា ឆ្នាំ២០២០ ជនរងគ្រោះឈ្មោះCALLUM IAIN MECULLOEM ភេទប្រុស អាយុ៤៨ឆ្នាំ ជនជាតិអូស្ត្រាលី បាន និងកំពុងស្នាក់នៅក្នុងផ្ទះលេខ២០៩E0 ផ្លូវលេខ១៩ ភូមិ១០ សង្កាត់ជ័យជំនះ ខណ្ឌដូនពេញ រាជធានីភ្នំពេញ រង់ចាំប្រពន្ធមកពីខួបកំណើតមិត្តភ័ក្ដិដោយពុំបានចាក់សោទ្វារផ្ទះ ពេលនោះស្រាប់តែជនសង្ស័យឈ្មោះអឿន ម៉ៅ ភេទប្រុស(ខ្ទើយ) អាយុ២២ឆ្នាំ បានដើរចូលក្នុងផ្ទះជនរងគ្រោះលួចយកថេបឡេតដែលដាក់លើតុក្បែរទូរទស្សន៍បានសម្រេចរត់គេចខ្លួនចេញមកក្រៅផ្ទះ ពេលនោះជនរងគ្រោះឃើញទាន់ ក៏រត់ដេញតាមពីក្រោយស្រែកឆោឡោ ពេលនោះកម្លាំងខណ្ឌ ប៉ុស្តិ៍ដែលកំពុងល្បាតឃើញបានអន្តរាគមន៍ ឃាត់ខ្លួនជនសង្ស័យ រួមជាមួយវត្ថុតាងជាក់ស្តែងយកមកប៉ុស្តិ៍នគរបាលរដ្ឋបាលជ័យជំនះសាកសួរ ។

បច្ចុប្បន្នជនសង្ស័យត្រូវសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌដូនពេញ និងកសាងសំណុំរឿងចាត់ការតាមនីតិវិធី ៕ ស រស្មី