សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ទីតាំងល្បែងស៊ីសងប្រភេទឆ្នោតវៀតណាមខុសច្បាប់ ដ៏ធំមួយ ដែលមានទីតាំងនៅខាងក្រោយផ្សារជម្ពូនវ័ន ស្ថិតក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ កំពុងបើកលេងយ៉ាងរលូនដោយមិនទាន់ឃើញមានអាជ្ញាធរមានសមត្ថកិច្ចចុះបង្ក្រាបចាំមើលតើលោកម៉ន វុធី អធិការនគរបាលខណ្ឌពោធិ៍ដែលទើបនឹងឡើងកាន់តំណែងថ្មីអាចមានសមត្ថភាពបង្ក្រាបទីតាំងឆ្នោតខាងលើនេះទេ និងអាចទាញចិត្តពលរដ្ឋបានដែរឬទេ?
គេសង្កេតឃើញថា ទីតាំងខាងលើនេះក្រុមទាំងនោះបានអង្គុយកត់កន្ទុយលេខវៀតណាមដោយបើកចំហរមិនញញើតកម្លាំងអាជ្ញាធរមានសមត្ថកិច្ចសូម្បីតែបន្តិចដោយសង្ស័យថា មានអ្នកធំនៅក្រោយខ្នងទើបអាជ្ញាធរមិនហ៊ានទៅក្បែរបែបនេះ ដោយផ្ទុយពីគោលនយោបាយរាជរដ្ឋាពិបាល ភូមិឃុំមានសុវត្ថិភាព ។
ថ្មីៗនេះ គណៈបញ្ជាការឯកភាពរាជធានីភ្នំពេញដែលដឹកនាំប្រជុំដោយលោកឃួង ស្រេងអភិបាលនៃគណៈអភិបាលរាជធានីភ្នំពេញបានដាក់បទបញ្ជាយ៉ាងតឹងរឹងឲ្យអាជ្ញាធរមូលដ្ឋានធ្វើការបង្ក្រាបរាល់ទីតាំង ល្បែងសុីសងគ្រប់ប្រភេទ ។
តែបែរជាទីតាំងខាងលើនេះ ហ៊ានបើកលេងយ៉ាងចំហរបែបនេះ ដោយផ្គើននឹងបទបញ្ជារបស់លោកប្រធានគណៈបញ្ជាការឯកភាពរាជធានីភ្នំពេញទៅវិញ ។
ជាមួយគ្នានេះផងដែរ ក្រុមការងារការសែននគរវត្តបានទាក់ទងទៅលោក ម៉ន វុធី អធិការដែលទើបនឹងឡើងកាន់តំណែងថ្មី តាមប្រព័ន្ធសង្គមវត្តស្អាប់ តែលោកមិនមានការឆ្លើយតបនោះទេ ។ ដោយឡែក លោកហែម ដារិទ្ធ អភិបាលនៃគណៈអភិបាលខណ្ឌ បានឆ្លើយតបតាមរយះតេឡេក្រាមយ៉ាងខ្លី ថា ទទួលបាន ។
ចាំមើលតើលោក ហែម ដារិទ្ធ អភិបាលនៃគណៈអភិបាលខណ្ឌពោធិ៍សែនជ័យ និងលោក ម៉ន វុធី អធិការនគរបាលដែលទើបឡើងកាន់តំណែងថ្មី អាចបង្ក្រាបក្រុមល្បែងទាំងនេះ បានដែរឬទេ ដើម្បីគោរពតាមបទបញ្ជាលោកអភិបាលរាជធានី ៕ សុខាសែនជ័យ
