នគរបាលប៉ុស្ដិ៍ចាក់អង្រែលើ ស្រាវជ្រាវចាប់ខ្លួនជនសង្ស័យម្នាក់ ក្រោយពីលួចម៉ូតូពលរដ្ឋបានសម្រេច

ភ្នំពេញ ៖ យោងតាមរបាយការណ៍របស់លោក អ៊ុំ រតនា នាយប៉ុស្ដិ៍នគរបាលរដ្ឋបាលចាក់អង្រែលើ បានឲ្យដឹងថានៅព្រឹកថ្ងៃទី៧ ខែមករា ឆ្នាំ២០២០នេះ កម្លាំងរបស់លោកបានស្រាវជ្រាវចាប់ខ្លួនជនសង្ស័យម្នាក់ ពាក់ព័ន្ធករណីអំពើលួច មានស្ថានទម្ងន់ទោសដោយការកាប់គាស់ទម្លុះទម្លាយ(គាស់សោរទ្វារផ្ទះយកម៉ូតូ) កាលពីវេលាម៉ោង២៣ម៉៤១នាទី ថ្ងៃទី១១ ខែតុលា ឆ្នាំ២០១៩ នៅចំណុចផ្ទះគ្មានលេខ ផ្លូវលេខ៣៧១ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។

ជនសង្ស័យឈ្មោះ បូ ដារ៉ូ ភេទ ប្រុស អាយុ ១៨ឆ្នាំ ជនជាតិខ្មែរ ទីលំនៅផ្ទះគ្មានលេខ ផ្លូវលំ ភូមិព្រែកតាគង់ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ មុខរបរ មិនពិតប្រាកដ (ឃាត់ខ្លួនមានផ្ទុកសារធាតុញៀន) ជនរងគ្រោះឈ្មោះ ទូច ទី ភេទស្រី អាយុ ៣៧ឆ្នាំ ជនជាតិខ្មែរ ទីលំនៅផ្ទះលេខ៨៩អឺ១,២ ផ្លូវបេតុង ភូមិ ព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។ ដោយសម្ភារៈបាត់បង់ ៖ ម៉ូតូ០១គ្រឿងម៉ាកស្គូបពី ពណ៍ស សេរី២០១៥ ពាក់ស្លាកលេខ ភ្នំពេញ 1FP 5621 ។

លោក អ៊ុំ រតនា នាយប៉ុស្ដិ៍នគរបាលរដ្ឋបាលចាក់អង្រែលើ បានឲ្យដឹងថា កាលពីថ្ងៃទី ១១ ខែ តុលា ឆ្នាំ ២០១៩ វេលាម៉ោង ២៣ម៉០០នាទី ជនរងគ្រោះឈ្មោះ ទូច ទី បានយកម៉ូតូមួយគ្រឿងម៉ាក ស្តុបពី ពណ៌ ស សេរីឆ្នាំ ២០១៥ ពាក់ស្លាកលេខ ភ្នំពេញ ១FP-៥៦២១ មកទុកនៅចំណុចផ្ទះជួលគ្មានលេខ ផ្លូវ ៣៧១ ភូមិ ព្រែកតាគង់១ សង្កាត់ ចាក់អង្រែលើ ខណ្ឌ មានជ័យ រាជធានីភ្នំពេញ (កន្លែងកើតហេតុ) ដោយបានដោតសោរម៉ូតូនៅជាប់នឹងកុងតាក់ម៉ូតូ រួចបានចាក់សោរទ្វារផ្ទះខាងលើហើយទៅសម្រាកនៅផ្ទះមួយផ្សេងទៀតនៅជិតកន្លែងកើតហេតុ ពេលសម្រាកបានមួយសន្ទុះជនរងគ្រោះបានបើកមើលកាំមេរ៉ាសុវត្ថិភាពតាមទូរស័ព្ទដៃស្រាប់តែបាត់ម៉ូតូរបស់ខ្លួន ពេលនោះជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលចាក់អង្រែលើ តែម្តង ភ្លាមៗនោះសមត្ថកិច្ចយើងបានចុះទៅដល់កន្លែងកើតហេតុខាងលើឆែកមើលកាំមេរ៉ាសុវត្ថិភាពឃើញជនសង្ស័យឈ្មោះ បូ ដារ៉ា ធ្វើសកម្មភាពលួចយកម៉ូតូម៉ាកស្តុបពី ពណ៌ ស សេរីឆ្នាំ ២០១៥ ពាក់ស្លាកលេខ ភ្នំពេញ ១FP-៥៦២១ ជិះគេចខ្លួនបាត់ទៅ លុះមកដល់ថ្ងៃទី ០៦ ខែមករា ឆ្នាំ ២០២០ វេលាម៉ោង២១ម៉៣០នាទី កម្លាំងសមត្ថកិច្ចប៉ុស្តិ៍នគរបាលចាក់អង្រែលើបានស្រាវជ្រាវឃាត់ខ្លួនជនសង្ស័យខាងលើនៅចំណុចផ្លូវ លំ ភូមិ ព្រែកតាគង់១ សង្កាត់ ចាក់អង្រែលើ យកមកសាកសួរនៅទីស្នាក់ការប៉ុស្តិ៍នគរបាលចាក់អង្រែលើ តែម្តង ។

បច្ចុប្បន្នជនសង្ស័យឈ្មោះ បូ ដារ៉ូ ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕ ភារ៉ា ដង្កោ