សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ កាលពីវេលាម៉ោង១និង២៦នាទីយប់រំលោងអធ្រាត្រឈានចូល ថ្ងៃទី១១ ខែមករា ឆ្នាំ២០២០ គ្រោះថ្នាក់ចរាចរណ៍រវាងម៉ូតូបុកពីក្រោយរថយន្ត បង្កឱ្យឆាបឆេះម៉ូតូស្លាប់ អ្នកជិះម៉ូតូនៅនឹងកន្លែង ត្រង់ចំណុចភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
សាក្សីបានឲ្យដឹងថា មុនពេលកើតហេតុគេឃើញម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ គ្មានផ្លាកលេខ បើកបរដោយឈ្មោះ ខៀវ បូរី ភេទប្រុស អាយុជាង៣០ឆ្នាំ មិនស្គាល់អាសយដ្ឋាន បើកបរពីកើតទៅលិចមកកើត។លុះ មកដល់ចំណុចខាងលើបានទៅបុករថយន្ដមួយគ្រឿងម៉ាកនីសាន់ ពណ៌ត្រេអ៊ី ពាក់ស្លាកលេខ ខេមរភូមិន្ទ 01.3-2067 សណ្ដោងសឺមីរ៉ឺម៉កគ្មានស្លាកលេខយ៉ាងពេញទំហឹង ដែលអ្នកអ្នកបើបររថយន្តនេះមិនស្គាល់អត្តសញ្ញាណនោះទេ ព្រោះគេចខ្លួនពីកន្លែងកើតហេតុបាត់ទៅខណៈរថយន្ដនេះកំពុងចតនៅលើផ្លូវជាតិ ទិសដៅស្របគ្នាជាមួយម៉ូតូ។
សាក្សីបានឲ្យដឹងទៀតថា ពេលនោះគេឃើញម៉ូតូបានបុករថយន្តនេះចំពីក្រោយពេញទំហឹង បង្កឱ្យមានអណ្តាតភ្លើងឆាបឆេះរហូតឆេះទាំងជនរងគ្រោះ បណ្តាលឱ្យស្លាប់ភ្លាមៗនៅនឹងន្លែងយ៉ាងរន្ធត់ ។
ពេលកើតហេតុភ្លាមសមត្ថកិច្ចនគរបាលស្រុកសំរោងទងបានចេញរថយន្ដពន្លត់អគ្គិភ័យរបស់អធិការដ្ឋានស្រុកមួយគ្រឿង និងប្រើប្រាស់ទឹកអស់មួយរថយន្ដដើម្បីបាញ់ទឹកពន្លត់រលត់ជាស្ថាពរ ។
ចំណែកវត្ថុតាងមធ្យោបាយធ្វើដំណើរទាំង២គ្រឿង ត្រូវបានសមត្ថកិចស្ទូចយកទៅរក្សាទុកនៅអធិការដ្ឋាននគរបាលស្រុកសំរោងទង រង់ចាំដោះស្រាយនៅពេលក្រោយ។ រីឯសាកសពជនរងគ្រោះ ត្រូវបានសមត្ថកិច្ចស្រាវជ្រាវរកគ្រួសារមកទទួលយកទៅធ្វើបុណ្យតាមប្រពៃណី ៕ ប្រាថ្នា
