សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ ជនសង្ស័យ២នាក់ ដែលត្រូវជាបងប្អូនបង្កើតនឹងគ្នា បែកគំនិតលបធ្វើសកម្មភាពលួចកាច់សោ.ក ម៉ូតូគេបានសម្រេច ហើយត្រូវម្ចាស់ម៉ូតូឃើញទាន់ស្រែកថា ចោរៗ បង្កការផ្អើលឆោឡោ ជាហេតុធ្វើឲ្យក្រុមជនសង្ស័យភ័យស្លន់ស្លោរត់កាត់ពីមុខបញ្ជាការកងរាជអាវុធហត្ថក្រុងព្រះសីហនុ ត្រូវក្រុមប្រជាពលរដ្ឋនាំគ្នាដេញចាប់បានម្នាក់ ក្រោមកិច្ចសហការជាមួយកម្លាំងកងរាជអាវុធហត្ថក្រុងព្រះសីហនុជាច្រើននាក់ ដែលនាំគ្នារត់ចេញប្រសាចពីក្នុងបន្ទាយផងនោះ ។
ករណីបង្កការភ្ញាក់ផ្អើលនេះ បានកើតមានឡើងកាលពីវេលាម៉ោង១និង៣០នាទីរសៀល ថ្ងៃទី២១ ខែមករា ឆ្នាំ២០២០ ចំណុចមុខកាស៊ីណូហូក ជាប់បណ្ដោយផ្លូវជាតិលេខ៤ តំបន់ឃ្លាំងលើ ស្ថិតនៅក្រុមទី១៦ ភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ ។
សមត្ថកិច្ចកងរាជអាវុធហត្ថក្រុងព្រះសីហនុ បានឲ្យដឹងថា ម្ចាស់ម៉ូតូ ឈ្មោះ គៀប វុទ្ធី ភេទប្រុសអាយុ៣១ឆ្នាំ រស់នៅកន្លែងកើតហេតុ ។ ចំណែកម៉ូតូម៉ាកZOOMER X ស៊េរី២០១៨ ពណ៌ឈាមជ្រូកលាយស ពាក់ស្លាកលេខ ព្រះសីហនុ 1H 1156 ។
មន្ត្រីកងរាជអាវុធហត្ថ បានឲ្យដឹងទៀតថា មុនពេលធ្វើសកម្មភាព ជនសង្ស័យមានគ្នា២នាក់ ប្រើប្រាស់មធ្យោបាយម៉ូតូស្កូពីពណ៌ខ្មៅ ជិះគ្នា២នាក់ ក្នុងនោះ ៖ ១-ឈ្មោះ មុំ សុគា ភេទប្រុស អាយុ២១ឆ្នាំ មានទីលំនៅភូមិ១ សង្កាត់១ ក្រុងព្រះសីហនុ ។ ២-ឈ្មោះ មុំ សុខ ភេទប្រុស មានទីលំនៅដូចគ្នា(ត្រូវជាបង) ។
សមត្ថកិច្ចកងរាជអាវុធហត្ថ បានឲ្យដឹងថា ជនសង្ស័យ ដែលឃាត់ខ្លួនបាន ឈ្មោះ មុំ សុគា និងដកហូតបានម៉ូតូជនរងគ្រោះមកវិញម៉ាកZOOMER X 01គ្រឿង ។ ចំណែកឈ្មោះ មុំ សុខ ជិះម៉ូតូគេចខ្លួនបាត់ ។
បច្ចុប្បន្នជនសង្ស័យ និងវត្ថុតាង ត្រូវបានបញ្ជូនទៅទីបញ្ជាការកងរាជអាវុធហត្ថខេត្ត ដើម្បីអនុវត្តន៍បន្ត ៕ ឆ្លាម សមុទ្រ
