សារព័ត៌មាន នគរវត្ត តែងតែនាំមុខគេជានិច្ច
មន្ត្រីជាន់ខ្ពស់របស់រដ្ឋាភិបាលថៃមួយរូបបានបញ្ជាក់ប្រាប់ប្រព័ន្ធផ្សព្វផ្សាយកាលពីថ្ងៃទី៣០ ខែមករា ឆ្នាំ២០២០ថា មនុស្សប្រុស ស្រី២នាក់ត្រូវចោទប្រកាន់ពីបទផ្សព្វផ្សាយព័ត៌មានក្លែងក្លាយ ទាក់ទងការរាតត្បាតជំងឺកូរ៉ូណាវីរុស ក្នុងនោះពួកគេត្រូវប្រឈមជាប់ពន្ធនាគារម្នាក់យ៉ាងតិច៥ឆ្នាំ ។
ជំងឺរលាកសួតថ្មី កូរ៉ូណាវីរុស ផ្ទុះឡើងនៅទីក្រុងវូហាន ខេត្ត Hubei ភាគកណ្តាលរបស់ប្រទេសចិន ចាប់តាំងពីថ្ងៃទី៨ ខែធ្នូ ឆ្នាំ២០១៩ ហើយបានឆ្លងរាលដាលយ៉ាងខ្លាំងនៅក្នុងតំបន់ និងពាសពេញជុំវិញពិភពលោក ក្នុងនោះប្រទេសថៃ ក៏មានឆ្លងករណីវីរុសនេះផងដែរ ។
រហូតមកដល់ថ្ងៃទី៣០ ខែមករា ឆ្នាំ២០២០ កូរ៉ូណាវីរុសឆ្លងនៅក្នុងប្រទេសចិន កើនឡើង ៩ ៨១៧នាក់ និងសម្លាប់មនុស្សអស់២១៤នាក់ ។ ប្រទេសចំនួន២៣ ជុំវិញពិភពលោក បានឆ្លងជំងឺនេះដែរ ប៉ុន្តែស្ថិតក្នុងករណីតិចតួចប៉ុណ្ណោះ ។ អង្គការសុខភាពពិភពលោកនៅថ្ងៃទី៣១ ខែមករា ឆ្នាំ២០២០ បានប្រកាសថា ជំងឺនេះជាភាពអាសន្នរបស់សាធារណៈ និងជាកង្វល់ព្រួយបារម្ភរបស់ពិពភពលោក ។ អង្គការនេះនៅមិនទាន់ផ្តល់អនុសាសន៍រិតបន្តឹងការធ្វើដំណើរ ឬការធ្វើពាណិជ្ជកម្មអ្វីនៅឡើយទេ ។
លោក Buddhipongse Punnakanta រដ្ឋមន្រ្តីក្រសួងសេដ្ឋកិច្ចឌីជីថល និងសង្គមប្រទេសថៃ បានប្រាប់ AFP ថា បុរស និងស្ត្រី២នាក់ ត្រូវបានចោទប្រកាន់ពីបទរំលោភលើបទឧក្រិដ្ឋរបស់ប្រទេសថៃ ដោយបង្ហោះលើបណ្តាញសង្គមអំពីមេរោគកូរ៉ូណានេះ កើតមាននៅក្នុងទីក្រុងឆ្នេរសមុទ្ររបស់ប្រទេសថៃ ដែលជាព័ត៌មានមិនពិត ។ ជនទាំងនេះអាចប្រឈមនឹងការជាប់ពន្ធនាគាររយៈពេល៥ ឆ្នាំ ។
លោក Buddhipongse Punnakanta បានបញ្ជាក់ថា“ពួកគេបានសារភាពរួចហើយថា ពួកគេពិតជាបានបង្កើតព័ត៌មានក្លែងក្លាយនេះប្រាកដមែន” ។ លោកថា ជនសង្ស័យបន្ថែមទៀត កំពុងស្ថិតក្រោមការស៊ើបអង្កេតរបស់ជំនាញ ជុំវិញកណីនេះ ។
គួរបញ្ជាក់ថា បើតាមប្រភពព័ត៌មានថៃអះអាងថា ប្រទេសនេះបានឆ្លងជំងឺកូរ៉ូណា១៤ករណី ក្លាយជាប្រទេសច្រើនជាងគេបំផុតបន្ទាប់ពីប្រទេសចិនដែលឆ្លងវីរូសកូរ៉ូណា ៕
