សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ជនសង្ស័យចំនួន៣នាក់ត្រូវបានសមត្ថកិច្ចស្រាវជ្រាវនិងឃាត់ខ្លួនជាបន្តបន្ទាប់ក្រោយពេលពួកគេធ្វើសកម្មភាពលួចកាច់កម៉ូតូរបស់មន្ត្រីយោធាមួយរូប ពេលជិះមកលេងផ្ទះសាច់ញាតិ ។ ក្រោយពេលឃាត់ខ្លួន ក្រុមជនសង្ស័យបានសារភាពថា ពួកខ្លួនពិតជាបានប្រព្រឹត្តដូចជនរងគ្រោះបានប្តឹងសមត្ថកិច្ចពិតប្រាកដមែន ។
ការឃាត់ខ្លួននេះ កាលពីរសៀលថ្ងៃទី៣១ ខែមករា ឆ្នាំ២០២០ នៅចំណុចភូមិខ្លែងពណ៌ខាងជើង ឃុំព្រៃញាតិ ស្រុកគងពិសី ខេត្តកំពង់ស្ពឺ ។ ជនសង្ស័យឈ្មោះ ឯក សំណាង ហៅ ម៉ាញ ភេទប្រុស អាយុ១៨ឆ្នាំ រស់នៅកន្លែងឃាត់ខ្លួនខាងលើ ដោយឡែកបក្ខពួកចំនួន២នាក់ទៀតមានឈ្មោះ សុខ លេញ ភេទប្រុស អាយុ២៨ឆ្នាំ ឈ្មោះ ឡឹក សាន ភេទប្រុស អាយុ៣៨ឆ្នាំ មានទីលំនៅភូមិ ឃុំជាមួយជនសង្ស័យខាងលើ ។
ប្រភពបានឲ្យដឹងថា កាលពីវេលាម៉ោង២២និង៣០នាទី ថ្ងៃទី៣១ ខែមករា សមត្ថកិច្ចបានទទួលពាក្យបណ្តឹងពីឈ្មោះ ឆិត តារា ភេទប្រុស អាយុ២៦ឆ្នាំ និងជាមន្ត្រីយោធាបានមកប្តឹងសមត្ថកិច្ចប៉ុស្តិ៍នគរបាលព្រៃញាតិឲ្យជួយអន្តរាគមន៍បន្ទាប់ពីម៉ូតូរបស់ខ្លួនត្រូវជនសង្ស័យខាងលើកាច់ក លួចយកទៅ ។ ប្រភពបន្តថា ក្រោយពីទទួលពាក្យបណ្តឹង សមត្ថកិច្ចប៉ុស្តិ៍ព្រៃញាតិ និងទឹកល្អក់ បានចេញល្បាត និងស្ទាក់មើលផ្លូវមុខសញ្ញាខាងលើ បន្ទាប់មក សមត្ថកិច្ចបានប្រទះឃើញម៉ូតូមួយគ្រឿង សេ ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1I-2595 ដែលជារបស់ជនរងគ្រោះ ត្រូវក្រុមជនសង្ស័យយកទៅប្លុងចោល នៅវាលស្រែខាងលិចភូមិខ្លែងពណ៌ខាងជើង ។
ប្រភពបានឲ្យដឹងទៀតថា នៅពេលរកឃើញម៉ូតូហើយ សមត្ថកិច្ចបានប្រទះឃើញជនសង្ស័យកំពុងដើរ ក៏ឃាត់ខ្លួនតែម្តង ។ នៅចំពោះមុខសមត្ថកិច្ច ក្រុមជនសង្ស័យបានសារភាពថា អ្នកដែលចូលទៅលួចកាច់កម៉ូតូរបស់ជនរងគ្រោះ គឺឈ្មោះ ឯក សំណាង ពេលលួចហើយ ក៏ជិះយកមកឲ្យឈ្មោះ សុខ លិញ និងឡឹក សាន ដើម្បីយកទៅលក់ តែមិនទាន់បានលក់ផង ក៏ត្រូវបានសមត្ថកិច្ចឃាត់ខ្លួនតែម្តង ។
នៅព្រឹកថ្ងៃទី១ ខែកុម្ភៈ សមត្ថកិច្ចជំនាញកំពុងកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តដើម្បីចាត់ការបន្តតាមនីតិវិធី ៕ សេនាស័ក្តិ
