សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ សមត្ថកិច្ចជំនាញ នៅស្រុកអន្លង់វែងខេត្តឧត្ដរមានជ័យ ហាក់ដូចជាមានការបិទបាំង រឿងឈូសឆាយ ដីព្រៃឈើស្រោង ដែលកំពុងធ្វើកម្មភាពឈូសឆាយ ១០០ហិកតា នៅភូមិត្រពាំងធំ និងភូមិស្រឡៅស្រោង ឃុំលំទង ស្រុកអន្លង់វែង ខេត្តឧត្ដរមានជ័យ ។
អស់រយ:ពេលជាច្រើនថ្ងៃមកហើយ រហូតមកដល់ថ្ងៃទី៥ ខែកុម្ភៈ ឆ្នាំ២០២០ សមត្ថកិច្ចជំនាញរដ្ឋបាលព្រៃមិនទាន់ទទួលបានច្បាប់ឈូសឆាយនៅឡើយ ទទួលបានតែលិខិតលក់ ទិញដីធ្លីតែប៉ុណ្ណោះ ។
បើតាមសមត្ថកិច្ចម្នាក់ បានឲ្យដឹងថា៖ ដីព្រៃឈើដែលកំពុងតែឈូសឆាយ ជារបស់ឧកញ៉ាម្នាក់ និងមានតួនាទីជាប្រធានសភាពាណិជ្ជកម្ម នៅខេត្តសៀមរាប ដែលបានទិញដីនោះ ។
លោកគង់ សារ៉េត នាយសង្កាត់រដ្ឋបាលព្រៃឈើអន្លង់វែង បានឲ្យដឹងថា៖ លោកបានទទួលតែលិខិតលក់ ទិញដី មិនទាន់ទទួលបានច្បាប់ឈូសឆាយព្រៃទេ លោកថា ច្បាប់ឈូសឆាយនៅចៅហ្វាយស្រុក ។
លោកហោជិន វីរ:យុទ្ធ អភិបាលស្រុកអន្លង់វែង បានឲ្យដឹងថា លោកមិនបានដឹងទេ ព្រោះគ្មានរបាយការណ៍ណាមួយមកដល់លោក ។
លោក ត្រ ស៊ីសុខឃាង ប្រធានមន្ទីរកសិកម្ម ខេត្តឧត្ដរមានជ័យ បានឲ្យដឹងថា ចាប់តាំងពីកម្លាំងជំនាញរដ្ឋបាលព្រៃឈើចុះទៅពិនិត្យ ចាប់តាំងពីថ្ងៃទី៣១ ខែមករា រហូតមកដល់ពេលនេះ លោកមិនទាន់ទទួលបានរបាយការណ៍ ឬសេចក្ដីរាយការណ៍ណាមួយឡើយ ។
សមត្ថកិច្ចម្នាក់បានឲ្យដឹងថា ក្នុងរឿងនេះ ហាក់ដូចជាមានការបិទបាំងខ្លាំងណាស់ សង្ស័យមានការពាក់ពន្ធ័ជាមួយសង្កាត់រដ្ឋបាលព្រៃឈើទៀតផង ៕ ប៉ែន នួន
