សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ កម្លាំងនគរបាលនៃអធិការក្រុងប៉ៃលិនបាន ចុះបង្ក្រាបករណីជួញដូរគ្រឿងញៀន និងប្រើប្រាស់សារធាតុ ញៀនខុសបទល្មើសនឹងច្បាប់ បានឃាត់ខ្លួនមនុស្សប្រុសស្រីជាជនសង្ស័យមានចំនួន ៧នាក់ និងរួមនឹងវត្ថុតាងថ្នាំសារធាតុញៀនមួយចំនួន ។
ករណីចុះបង្ក្រាបទីតាំង មុខសញ្ញានេះនៅ វេលាម៉ោង១២ ថ្ងៃត្រង់ រហូតដល់ម៉ោង១៩និង០០នាទី ថ្ងៃទី៤ ខែកុម្ភៈ ឆ្នាំ២០២០ ស្ថិតក្នុងភូមិចំនួន២ ទី១ នៅភូមិបរឌិននៀវ ទី២ភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន។
បើតាមជំនាញសមត្ថកិច្ចនគរបាលក្រុងប៉ៃលិន
បានឲ្យដឹងថា ៖ នៅមុនពេលចុះបង្កាប កម្លាំងជំនាញបានធ្វើការស្រាវជ្រាវមុខសញ្ញារួមក៏បាន ឃាត់ខ្លួនជនសង្ស័យម្នាក់ ឈ្មោះ ណុះ ហ្វរី ភេទប្រុស អាយុ៣៧ឆ្នាំ មុខរបរមិនពិតប្រាកដ នៅចំណុចខាងក្រោយវិហាខ្មែរ អ៊ីស្លាម នៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន បានដកវត្ថុតាង មានម្សៅក្រាមពណ៌សថ្លា (សង្ស័យម៉ាទឹកកក) ចំនួន៣កញ្ចប់តូច និង ០១កញ្ចប់ធំពីជនសង្ស័យ។
សមត្យកិច្ចជំនាញបានបន្តថា ៖ បន្ទាប់ពីកម្លាំងបានការឃាត់ខ្លួនជនសង្ស័យខាងលើ រួច ជំនាញក៏បានបន្តធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យចំនួន០៣នាក់បន្ថែមទៀត ដែលជាអ្នកជួញដូរសារធាតុញៀនល្មើ
សនឹងច្បាប់ ជនសង្ស័យ៣ នាក់ស្ថិតនៅចំណុចកន្លែងចិញ្ចឹមមាន់ មួយកន្លែង ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិនដោយរឹបអូសបានវត្ថុតាង ម្សៅក្រាមពណ៌សថ្លា(សង្ស័យម៉ាទឹកក)ចំនួន០៧កញ្ចប់តូច និង០៣កញ្ចប់ធំ ក្រោយ មកទៀត រហូតដល់វេលាម៉ោង១៩ និង០០នាទី យប់ថ្ងៃខែឆ្នាំដដែល ក៏បានធ្វើការឃាត់ខ្លួនជនសង្ស័យចំនួន០៣នាក់បន្ថែមទៀត ដែលជាប់ពាក់ព័ន្ធនឹងករណីប្រើប្រាស់គ្រឿងញៀនខុសច្បាប់ នៅចំណុចកើតហេតុខាងលើផងដែរ ។
ជនសង្ស័យ ដែលសមត្ថកិច្ចធ្វើការឃាត់ខ្លួនរួមមាន ៖ ទី១.ឈ្មោះ ណុះ ហ្វរី ភេទប្រុស អាយុ៣៧ឆ្នាំ មុខរបរមិនពិតប្រាកដ នៅចំណុចខាងក្រោយព្រះវិហាអ៊ីស្លាម ស្ថិតក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន, ទី២.ឈ្មោះ ចាន់ សំណាង ភេទប្រុស អាយុ៤១ឆ្នាំ មុខរបរមិនពិតប្រាកដ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន អ្នកជួញដូរគ្រឿងញៀន ទី៣.ឈ្មោះ ភូ រ៉ា ភេទស្រី អាយុ៤១ឆ្នាំ មុខរបរកសិករ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ត្រូវជាប្រពន្ធជនសង្ស័យជួញដូរគ្រឿងញៀន ,ទី៤.ឈ្មោះ សំ រិទ្ឋ ភេទស្រី អាយុ៣២ឆ្នាំ មុខរបរកសិករ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ត្រូវជាប្រពន្ធ ជនសង្ស័យជួញដូរគ្រឿងញៀន ទី៥.ឈ្មោះ សា វីន ភេទប្រុស អាយុ១៧ឆ្នាំ មុខរបរកសិករ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន) ,ទី៦.ឈ្មោះ ណេង សុភា ភេទប្រុស អាយុ២៤ឆ្នាំ មុខរបរកសិករ រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន) និងទី៧.ឈ្មោះ សាន់ ញាក់ ភេទប្រុស អាយុ២៤ឆ្នាំ មុខរបរច្នៃត្បូង រស់នៅភូមិវត្ត សង្កាត់ប៉ៃលិន ក្រុងប៉ៃលិន (មានផ្ទុកសារធាតុញៀន)។
បច្ចុប្បន្នជនសង្ស័យទាំងអស់ខាងលើ ត្រូវបានកម្លាំងជំនាញ កំពុងធ្វើការសួរនាំ នៅអធិការដ្ឋាននគរបាលក្រុងប៉ៃលិន និងរៀបចំសំណុំរឿងបញ្ជូនទៅតុលាការចាត់ការតាមនិតិវិធី ៕ស សារ៉េត
