សារព័ត៌មាន នគរវត្ត តែងតែនាំមុខគេជានិច្ច
អ្នកដំណើរតាមកប៉ាល់ដឹកអ្នកដំណើរ Diamond Princess ចំនួន៤១នាក់បន្ថែមទៀត ត្រូវជប៉ុនរកឃើញថា មានផ្ទុកជំងឺរលាកសួតថ្មីបង្កឡើងដោយវីរុសកូរ៉ូណា(2019-nCoV)។
តាមការបញ្ជាក់ពីលោករដ្ឋមន្ត្រីក្រសួងសុខាភិបាលប្រទេសជប៉ុន កាលពីថ្ងៃទី៧ ខែកុម្ភៈ ឆ្នាំ២០២០ អះអាងថា ការកើនឡើងអ្នកជំងឺកូរ៉ូណានៅលើនាវាដឹកមនុស្សដែលត្រូវជប៉ុន បានឃាត់ទុក ហើយដាក់ឲ្យនៅដាច់ដោយឡែកពីគេឯងនោះ បានកើនឡើងសរុប៦១នាក់ ។
អាជ្ញាធរសុខាភិបាលជប៉ុនមកទល់ពេលនេះ បានធ្វើតេស្តិ៍រកវីរុសទៅលើមនុស្ស២៧៣នាក់ចុងក្រោយ ស្ថិតនៅលើកប៉ាល់ដឹកអ្នកដំណើរ Diamond Princess ដែលបានឃាត់ និងដាក់ឲ្យស្ថិតនៅឆ្ងាយពីគេឯង ក្រោយពីអតីតអ្នកដំណើរម្នាក់នៅលើកប៉ាល់នេះបានធ្វើដំណើរទៅកាន់ហុងកុងកាលពីខែមុន ហើយមានផ្ទុកវីរុសកូរ៉ូណា ។
ថ្លែងប្រាប់អ្នកកាសែត រដ្ឋមន្ត្រីក្រសួងសុខាភិបាលជប៉ុន Katsumobu Kato បានថ្លែងថា «លទ្ធផលអ្នកដំណើរដែលពិនិត្យចុងក្រោយចំនួន១៧១នាក់នោះ គឺ៤១នាក់ ចេញលទ្ធផលវិជ្ជមាន ។ ថ្ងៃនេះ ពួកគេទាំងនោះ នឹងត្រូវបញ្ជូនទៅកាន់មន្ទីរពេទ្យផ្សេងៗគ្នា, យើងបាននិងកំពុងរៀបចំហើយ»។ លោកបញ្ជាក់ថា អ្នកជំងឺឆ្លងវីរុសនេះទាំងអស់នៅលើកប៉ាល់ សុរបកើនឡើង៦១នាក់ ។
លោក Kato បញ្ជាក់ថា អ្នកជំងឺឆ្លងវីរុសកូរ៉ូណាថ្មី៤១នាក់នេះ មានពលរដ្ឋជប៉ុន២១នាក់, ជនជាតិអាមេរិក, កាណាដា, អូស្ត្រាលី, អាហ្សង់ទីន និងអង់គ្លេសផងដែរ ។
គួររំលឹកថា អ្នកដំណើរនៅលើនាវា Diamond Princess ទាំងអស់ ៣ ៧០០នាក់ បូករួមទាំងនាវិកផងដែរ បានមកដល់ឈូងសមុទ្រជប៉ុន កាលពីរសៀលថ្ងៃទី៣ ខែកុម្ភៈ ។ នាវានេះបានចូលដល់កំពង់ផែ Yokohama ហើយត្រូវបានជប៉ុនកំណត់ដាក់ឲ្យនៅដោយឡែកឆ្ងាយពីគេឯង រហូតដល់ថ្ងៃទី១៩ ខែកុម្ភៈ ឆ្នាំ២០១៩ ដើម្បីបង្កាឆ្លងរាលដាលជំងឺកូរ៉ូណា ។
មន្ត្រីសុខាភិបាលជប៉ុនបានបញ្ជាក់ថា «អ្នកដំណើរ២០នាក់ ពីមុននេះដែលផ្ទុកវីរុសកូរ៉ូណានោះ បានបញ្ជូនចេញពីនាវា ក្នុងនោះម្នាក់មានស្ថានភាពជំងឺធ្ងន់ធ្ងរជាងគេ»៕
