សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ មុខសញ្ញាជួញដូរថ្នាំញៀនមួយសំបុកត្រូវបានសមត្ថកិច្ចឃាត់ខ្លួនបានជាបន្តបន្ទាប់ក្រោយពីឃាត់បានជនសង្ស័យម្នាក់រួចមក ។ ការឃាត់ខ្លួនក្រុមជនសង្ស័យនេះ ធ្វើឡើងកាលពីរសៀលថ្ងៃ ទី០៦ ខែកុម្ភៈ ឆ្នាំ ២០២០ ដោយ កម្លាំងប៉ុស្តិ៍នគរបាលរដ្ឋបាលដំបូករូង បានចុះល្បាតគោលដៅប្រឈម ។
ប្រភពបានឲ្យដឹងថា ដំបូងឡើយសមត្ថកិច្ចបានឃាត់មុខសញ្ញាសង្ស័យពាក់ពន្ធ័នឹងបទល្មើសគ្រឿងញៀន ០១នាក់ ឈ្មោះ ហួន ឆានុន ភេទប្រុស អាយុ១៩ឆ្នាំ រស់នៅភូមិព្រៃច្រេស ឃុំអូរ ស្រុកភ្នំស្រួច ឃាត់នៅចំនុច ភូមិតាយ៉ុង ឃុំដំបូករូង ស្រុកភ្នំស្រួច ដកហូតម្សៅក្រាមពណ៌សថ្លា សង្ស័យជាគ្រឿងញៀនចំនួន ០១កញ្ចប់តូច និងសម្ភារឧបករណ៍ប្រើប្រាស់គ្រឿងញៀន មួយចំនួន បញ្ជូនមកសាកសួរអធិការដ្ឋាននគរបាលស្រុកភ្នំស្រួច ។
ប្រភពបន្តថា តាមការសាកសួរចម្លើយបឋម ឈ្មោះខាងលើបានឆ្លើយសារភាពថា ខ្លួនបានទិញគ្រឿងញៀន ពីចំនុចផ្ទះលក់ភេសជ្ជះគ្រប់មុខតាមដងផ្លូវជាតិលេខ៤ ចន្លោះគីឡូម៉ែត្រលេខ ៨១ និង៨២ ស្ថិតក្នុងភូមិពាមទុង ឃុំត្រែងត្រយឹង ស្រុកភ្នំស្រួច ចំនូន០២លើក នៅថ្ងៃទី០៦ ខែកុម្ភះ ឆ្នាំ២០២០ លើកទី០១ នៅវេលាម៉ោង ០៥ និង០០នាទីព្រឹក ទិញចំនួន ៤០០០០ រៀល និងលើកទី០២ នៅវេលាម៉ោង ០៦ និង០០នាទី ។
បន្ទប់ពីស្តាប់ចម្លើយសារភាពរបស់ជនសង្ស័យរួចមកសមត្ថកិច្ចមូលដ្ឋានបានរាយការណ៍ជូនលោកឧត្តមសេនីយ៍ត្រី ម៉ាត់ ធុច ស្នងការរងទទួលបន្ទុក ផែនប្រឆាំងគ្រឿងញៀន នៃស្នងការដ្ឋាននគរបាលខេត្តកំពង់ស្ពឺ និងមានការអនុញ្ញាតិ ពីលោកស្រី ចាតសូ រស្មី ព្រះរាជអាជ្ញារអមសាលាដំបូងខេត្តកំពង់ស្ពឺ កម្ហាំងជំនាញ ដែលមាន កម្លាំងការិយាល័យប្រឆាំងគ្រឿងញៀនខេត្ត កម្លាំងរដ្ឋបាលស្រុកភ្នំស្រួច ដឹកនាំដោយលោក ហន ពិសិដ្ឋ អភិបាលស្រុក កម្លាំងអធិការដ្ឋានដឹកនាំដោយលោក សាយ ប៊ុនថន អធិការនគរបាលស្រុកភ្នំស្រួច និងមានការចូលរួម ពីលោកមេឃុំត្រែងត្រយឹង កម្លាំងប៉ុស្តិ៍នគរបាលរដ្ឋបាលត្រែងត្រយឹង លោកមេភូមិពាមទុង បានអនុវត្តនៅនិតិវិធីជំនាញ ឆែកឆេរផ្ទះ និងកន្លែងលក់ដូររបស់ឈ្មោះ ហ៊ន ច្រិប ហៅស្រីអូន ភេទស្រី អាយុ៣៧ឆ្នាំ ជាម្ចាស់ផ្ទះ និងកន្លែងលក់ដូរភេសជ្ជះចំនុចដូចបានរៀបរាប់ខាងលើ ។
លោក សាយ ប៊ុនថន បានបញ្ជាក់ថា ក្នុងការចុះឆែកឆេរសមត្ថកិច្ចរុករកឃើញ ៖ ម្រៅក្រាមពណ៌សថ្លា ចំនួន០៧កញ្ចប់ (ធំ០៥ តូច០២កញ្ចប់), ជញ្ជីងថ្លឹងអេឡិចត្រនិចចំនួន ០១, ទូរសព្ទ័ដៃចំនួ១៤គ្រឿង (សាមសុង០៣ ណូគា០៣ វីវ៉ូ០៣ អាយហ្វូន០២ អូប៉ូ០១ ខេមហ្វូន០១ អេសខេជី០១), ឧបករណ៍កែច្នៃ សំរាប់ចូកគ្រឿងញៀនចំនួន ០៧ នឹងឧបករណ៍កែច្នៃសំរាប់ប្រើប្រាស់គ្រឿងញៀនមួយចំនួន, ថង់ផ្លាស្ទីកសំរាប់ច្រកគ្រឿងញៀនមួយចំនួន, កន្ត្រៃ០៤ ដាវ០៤ កាំបិត០២ ពូថៅ០១, ឆ្នោតឡាគី ០១ដុំ មិនទាន់កោស, សន្លឹកឆ្នោតកោសរួចមួយចំនួន, ប្រាក់រៀលចំនួន ៣លានរៀល ប្រាក់ដុល្លារចំនួន ៣០០ដុល្លារ លុយវៀតណាមចំនួន ០១លាន ៦២ម៉ឺនដុង និងរថយន្ត០១គ្រឿង ម៉ាកអាតូស ស្លាកលេខ ភ្នំពេញ 2S-4155 ពណ៌ទឹកប៊ិច ម៉ូតូចំនួន០២គ្រឿង -ម៉ាកនិចពណ៌ស ០១ -ម៉ាកអ៊ិចសិនទ័រ ពណ៌ខ្មៅ០១
សមត្ថកិច្ចឃាត់ខ្លួនមុខសញ្ញានៅកន្លែងកើតហេតុចំនួន ០៧នាក់ ៖ ឈ្មោះ ហេង សាវ៉ាត ភេទប្រុស អាយុ២៧ឆ្នាំ រស់នៅភូមិក្រាំងខ្វាវ ឃុំគីរីវន្ត័ ស្រុកភ្នំស្រួច, ឈ្មោះ ហ៊ន ចាន់ណា ភេទប្រុស អាយុ២៥ឆ្នាំ រស់នៅភូមិកំពង់ពោធិ ឃុំកំពង់ភ្នំ ស្រុកលើកដែក ខេត្តកណ្តាល, ឈ្មោះ វង ព្រឹម ភេទប្រុស អាយុ៤៤ឆ្នាំ រស់នៅភូមិកំពង់ពោធិ ឃុំកំពង់ភ្នំ ស្រុកលើកដែក ខេត្តកណ្តាល, ឈ្មោះ ផុន ភីម ភេទប្រុស អាយុ៣៤ឆ្នាំ រស់នៅភូមិទួលឯក ឃុំទួលតាឯក ស្រុកស្វាយប៉ោ ខេត្តបាត់ដំបង, ឈ្មោះ ពុំ រដ្ឋា ភេទប្រុស អាយុ២០ឆ្នាំ រស់នៅភូមិក្រាំងចេក ឃុំក្រាំងចេក ស្រុកឧត្តុង, ឈ្មោះ ហ៊ន ច្រឹប ហៅស្រីអូន ភេទស្រី អាយុ៣៧ឆ្នាំ រស់នៅភូមិកំពង់ពោធិ ឃុំកំពង់ភ្នំ ស្រុកលើកដែក ខេត្តកណ្តាល និង សន ស្រីពេជ្រ ភេទស្រី អាយុ១៨ឆ្នាំ រស់នៅភូមិសន្ទីទី២ ឃុំកក់ ស្រុកពញ្ញាក្រែក ខេត្តត្បូងឃ្មុំ
វត្ថុតាងខាងលើ និងមុខសញ្ញាទាំង០៧ នាក់ សមត្ថកិច្ចបញ្ជូន មកកាន់អធិការដ្ឋាននគរបាលស្រុកភ្នំស្រួច ដើម្បីសាកសួរ និងកសាងសំណុំរឿង អនុវត្តតាមនិតិវិធី ៕សេនាស័ក្តិ
