សារព័ត៌មាន នគរវត្ត តែងតែនាំមុខគេជានិច្ច
ឥណ្ឌាបានថ្កោលទោសយ៉ាងខ្លាំងក្លាចំពោះការវាយប្រហារភេរវកម្មមួយនៅទីក្រុងកាបុល ប្រទេសអាហ្វហ្គានីស្ថាន សម្លាប់អាយុជីវិតមនុស្ស៦នាក់ និង១២នាក់ផ្សេងទៀតរងរបួស កាលពីថ្ងៃទី១១ ខែកុម្ភៈ ឆ្នាំ២០២០នោះ ។
ក្រសួងកិច្ចការបរទេសឥណ្ឌា កាលពីព្រលប់ថ្ងៃទី១១ ខែកុម្ភៈ បានថ្លែងការណ៍មួយច្បាប់ថា «ឥណ្ឌាថ្កោលទោសបំផុត ទង្វើភេរវកម្មយង់ឃ្នង សម្លាប់មនុស្សនៅព្រឹកមិញនេះ នៅពីមុខមហាវិទ្យាល័យការពារជាតិ Marshal Fahim ក្នុងទីក្រុងកាបុល»។
ប្រភពបន្តថា «យើងសូមចូលរួមរំលែកទុក្ខក្រៀមក្រំនេះ ជាមួយសាច់ញាតិជនរងគ្រោះទាំងនោះ ដែលបាត់បង់ជីវិត និងរងរបួស ក៏ដូចរំលែកទុក្ខជាមួយរដ្ឋាភិបាល និងប្រជាជនអាហ្វហ្គានីស្ថានផងដែរ ។ យើងសូមបួងសួងដល់ជនរងរបួសឆាប់ជាសះស្បើយពីរបួស»។
ឥណ្ឌាបានបញ្ជាក់ទៀតថា សហគមន៍អន្តរជាតិត្រូវរួបរួមសាមគ្គីគ្នាប្រឆាំងតទល់ជាមួយក្រុមភេរវកម្ម និងចាប់ជនដែលប្រព្រឹត្ត និងអ្នកឧបត្ថម្ភដល់អង្គការភេរវកម្មមកផ្តន្ទាទោសតាមច្បាប់ ។
ប្រព័ន្ធផ្សព្វផ្សាយអាហ្វហ្គានីស្ថានបានផ្សាយថា គ្រាប់បែកអត្តឃាតបានបំផ្ទុះឡើងសម្លាប់មនុស្សយ៉ាងតិច៦នាក់ នៅជិតសាកលវិទ្យាល័យយោធាមួយមួយកន្លែងទីក្រុងកាបុល ប្រទេសអាហ្វហ្គានីស្ថាន ។
ការវាយប្រហារនេះបានចាត់ទុកជាការវាយប្រហារទ្រង់ទ្រាយធំបំផុតក្នុងឆ្នាំ២០២០នេះ ៕
