សារព័ត៌មាន នគរវត្ត តែងតែនាំមុខគេជានិច្ច
បញ្ហាព្រិលធ្លាក់កំពុងចោទជាបញ្ហានៅក្នុងប្រទេសអាហ្វហ្គានីស្ថាន ជាពិសេសនៅខេត្តភាគកណ្តាលប្រទេសតែម្តង ខណៈប៉ុន្មានថ្ងៃកន្លងទៅថ្មីនេះ គ្រោះថ្នាក់ផ្សេងៗបណ្តាលមកពីការធ្លាក់ព្រិល បានសម្លាប់មនុស្សយ៉ាងតិច២១នាក់ ។ នេះបើតាមអាជ្ញាធរក្នុងតំបន់ បញ្ជាក់ប្រាប់ប្រភពព័ត៌មាននៅថ្ងៃទី១៤ ខែកុម្ភៈ ២០២០ ។
លោក Ahmad Tameem Azimi អ្នកនាំពាក្យក្រសួងគ្រប់គ្រងគ្រោះមហន្តរាយបានបញ្ជាក់ចា មនុស្ស៧នាក់នៅបាត់ខ្លួន ក្រោយហេតុការណ៍បាក់ព្រិលនៅខេត្ត Daykundi ។ លោកបញ្ជាក់ថា មនុស្ស១០នាក់ផ្សេងទៀតបានរងរបួស ។ ហេតុការណ៍បាក់ព្រិលនោះបានកើតឡើងនៅថ្ងៃទី១៣ ខែកុម្ភៈ ឆ្នាំ២០២០។
ជនរងគ្រោះបាត់បង់ជីវិត២១នាក់ គឺមកពីគ្រួសារចំនួន២នៅក្នុងតំបន់ ។ លំនៅឋានប្រហែល៥០ខ្នងផ្សេងទៀត រងការបំផ្លិចបំផ្លាញផងដែរ ដោយសារគ្រោះថ្នាក់នេះ ។ លោក Azimi បានបន្ថែមថា ក្រុមសង្រ្គោះបាននិងកំពុងធ្វើការងារស្វែងរក អ្នកនៅបាត់ខ្លួន និងជួយជនរងគ្រោះនៅកន្លែងកើតហេតុតាំងពីថ្ងៃព្រហស្បតិ៍មកម្ល៉េះ ។
ជនរងគ្រោះបាត់បង់ជីវិតអាចកើនឡើងច្រើនជាងនេះ។ ស្ថានភាពអាកាសធាតុត្រជាក់ជាកត្តាលំបាកចម្បងក្នុងកិច្ចការជួយសង្គ្រោះរបស់ក្រុមជួយសង្គ្រោះ។ ផ្លូវហាយវ៉េភាគច្រើនបានបិទចរាចរណ៍រាប់សប្តាហ៍ឯណោះ ដោយសារតែព្រិលធ្លាក់ក្រាស់ឃ្មឹក និងការភ័យខ្លាចផ្ទាំងព្រិលបាក់សង្កត់ ។
រដូវត្រជាក់បានចូលមកដល់នៅក្នុងប្រទេសអាហ្វហ្គានីស្ថាន ហើយព្រិលក៏កាន់តែធ្លាក់ខ្លាំង បូករួមគ្រោះទឹកជំនន់ថែមទៀតធ្វើឲ្យប្រទេសនេះរងទុក្ខផ្ទួនៗ ។ គិតរយៈពេល២ខែកន្លងមកនេះ គ្រោះថ្នាក់បាក់ព្រិល និងទឹកជំនន់សម្លាប់មនុស្សកើនឡើង៧២នាក់ ។ រងរបួសច្រើននាក់ និងផ្ទះសម្បែងប្រហែល២ ៤០០ខ្នងខូចខាត ។
ប្រទេសអាហ្វហ្គានីស្ថានបានទទួលរងនូវសង្គ្រាម និងជម្លោះហិង្សាប្រហែលជាង៤ទសវត្សរ៍ ចាប់តាំងពីសម័យឈ្លានពានដោយសហភាពសូវៀតឆ្នាំ១៩៧៩។ ប៉ុន្តែគ្រោះមហន្តរាយធម្មជាតិ ដូចជាបាក់ដី, ទឹកជំនន់, ការបាក់ព្រិលធ្លាក់សង្កត់សម្លាប់មនុស្ស បាននាំឲ្យស្លាប់មនុស្សកើនឡើងជាបន្តបន្ទាប់ ។ អាហ្វហ្គានីស្ថានជាប្រទេសដែលពុំសូវមានការអភិវឌ្ឍហេដ្ឋារចនាសម្ពន្ធនៅខាងទីក្រុងនោះឡើយ ។ ភាពរិចរិលផ្នែកបរិស្ថាននៅក្នុងប្រទេសនេះក៏កំពុងក្លាយជាបញ្ហាធ្ងន់ធ្ងរក្នុងប្រទេសនេះផងដែរ ៕
