សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលវេណេហ្ស៊ុយអេឡា បានផ្ញើលិខិតឡើងទៅកាន់តុលាការឧក្រិដ្ឋកម្ម អន្តរជាតិ ICC ឲ្យបើកការស្រាវជ្រាវ ពីបទឧក្រិដ្ឋកម្មប្រឆាំងមនុស្សជាតិរបស់អាមេរិកតាមរយៈការដាក់ទណ្ដកម្មសេដ្ឋកិច្ចទៅលើប្រទេសវេណេហ្ស៊ុយអេឡា។
មានប្រសាសន៍ទៅកាន់ក្រុមអ្នកសារព័ត៌មាន រដ្ឋមន្ត្រីក្រសួងការបរទេសវេណេហ្ស៊ុយអេឡា លោក Jorge Arreaza បានបញ្ជាក់ថា សកម្មភាពរបស់អាមេរិក គឺជាសង្គ្រាមប្រឆាំងពលរដ្ឋវេណេហ្ស៊ុយអេឡា បំពានច្បាប់ងន្តរជាតិ ដូច្នេះអាមេរិកត្រូវតែបញ្ចប់ជាបន្ទាន់។
ជាមួយគ្នានោះដែរ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បាននិយាយថា អាជ្ញាធររបស់លោកមិនបានចាប់ខ្លួនមេដឹកនាំគណបក្សប្រឆាំង លោក ហ្ស៊ាន ហ្គៃដូ (Juan Guaido) បញ្ជូនទៅពន្ធនាគារដោយសារតែតុលាការមិនបានចេញបញ្ជា។ ប៉ុន្តែព្រមពេលជាមួយគ្នាលោកព្រមានថា ការចាប់ខ្លួនលោក Guaido អាចនឹងត្រូវធ្វើឡើង។
នៅក្នុងជំនួបជាមួយសារព័ត៌មានអន្តរជាតិនៅថ្ងៃសុក្រសប្ដាហ៍នេះ (ពេលវេលានៅអាមេរិកឡាទីន) លោក ម៉ាឌូរ៉ូ បានគូសបញ្ជាក់ថា «ប្រព័ន្ធតុលាការវេណេស៊ុយអេឡានឹងសម្រេចចិត្តថា តើត្រូវបញ្ជូនលោក Guaido ទៅកាន់ពន្ធនាគារ ឬក៏យ៉ាងណាសម្រាប់បទឧក្រិដ្ឋដែលលោកបានប្រព្រឹត្ត… ជាការពិតណាស់ ថ្ងៃនោះមិនទាន់មកដល់នោះទេ ប៉ុន្តែលោកនឹងបានទៅដេកក្នុងពន្ធនាគារ ហើយថ្ងៃនោះនឹងមកដល់»។
គួរជម្រាបថា ការលើកឡើងរបស់លោក នីកូឡាស់ ម៉ាឌូរ៉ូ កើតមានឡើងតែបីថ្ងៃប៉ុណ្ណោះ បន្ទាប់ពីលោក Guaido បានត្រឡប់មកពីសហរដ្ឋអាមេរិក និងអឺរ៉ុបវិញ រីឯខាងទីក្រុងការ៉ាកាស់បានចោទថា ការធ្វើដំណើរទៅបរទេសនេះ គឺជាទង្វើរំលោភលើបទបញ្ជាតុលាការកំពូលវេណេស៊ុយអេឡា ដែលបានហាមលោក Guaido ធ្វើដំណើរចាកចេញពីប្រទស៕
