សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ សាកសពបុរសដែលជាកូនដៃទូករងគ្រោះម្នាក់ទៀត ដែលលិចទូកដឹកដែកហើយបាត់ខ្លួននោះ ត្រូវបានរកឃើញហើយ នៅវេលាថ្ងៃត្រង់ថ្ងៃទី២៥ ខែកុម្ភ: ឆ្នាំ២០២០ ។
មន្ត្រីប៉ុស្តិ៍នគរបាលរដ្ឋបាលសង្កាត់កោះរ៉ុង ដែលប្រទះឃើញសាកសពនេះ អណ្តែតតាមទឹកមកលើឆ្នេររំដួលកោះរ៉ុងចំណុចភូមិដើមថ្កូវ សង្កាត់កោះរ៉ុង ក្រុងកោះរ៉ុង ថ្លែងថា សាកសពដែលរកឃើញក្រោយនេះ សមត្ថកិច្ចបង្ហាញរូបភាពទៅជូនសាច់ញាតិ និងអ្នកលិចទូកជាមួយគ្នាដែលនៅមានជីវិត តាមរយៈសម្លៀកបំពាក់ និងនាឡិការដៃដែលពាក់ជាប់នឹងសាកសព បង្ហាញថា ជនរងគ្រោះម្នាក់នេះ ឈ្មោះ ស៊ន ដំ ភេទប្រុស អាយុ១៦ឆ្នាំ មុខរបរ ជាងផ្សាដែក មានស្រុកកំណើតនៅ ខេត្តកណ្តាល។
សូមបញ្ជាក់ថា ជនរងគ្រោះ២នាក់ ដែលបាត់ខ្លួន ក្រោយលិចទូកនៅសមុទ្រជិតកោះថាស កាលពីថ្ងៃ២២ ខែកុម្ភៈ ឆ្នាំ២០២០ បានរកឃើញអស់ហើយ មិនមានអ្នកនៅរស់រានមានជីវិតទេ ក្នុងនោះសាកសពជនរងគ្រោះម្នាក់ ឈ្មោះអ៊ុន ម៉ៅអាយុ៤២ឆ្នាំ រស់នៅភូមិ៣សង្កាត់លេខ៣ក្រុងព្រះសីហនុ បានរកឃើញកាលពីរសៀលថ្ងៃ២៤ ខែកុម្ភៈ នៅចំណុចជិតពោងភ្លើងសុីញ៉ូ ខាងក្រោយកោះរ៉ុងសន្លឹម ក្រុងកោះរ៉ុងខេត្តព្រះសីហនុ ៕ ឆ្លាម សមុទ្រ
