ព័ត៌មានទាន់ហេតុការណ៍៖

អង់គ្លេសថា រុស្ស៊ី​ចូលកៀក​ដែនអាកាស រុស្ស៊ីតបវិញថា អត់មានទេ

ចែករំលែក៖

យោងតាមការផ្សាយរបស់ប្រភពព័ត៌មានsputnik​បញ្ជាក់ថា កាលពីថ្ងៃទី២៦ ខែកុម្ភៈ យោធា​អង់គ្លេស​បានបញ្ចេញយន្តហោះចម្បាំង​២គ្រឿង​ ហោះទៅស្ទាក់​​បណ្តេញយន្តហោះរុស្ស៊ី​គឺយន្តហោះ​ទម្លាក់​គ្រាប់បែក​ ដែលកំពុងហោះហើរ​នៅក្បែរឈូងសមុទ្រ​របស់​អង់គ្លេស ។ រុស្ស៊ី​បានច្រានចោលថា មិនបានចូលកៀកដែនអាកាស​របស់ប្រទេសណាមួយទេ។

កងនាវាចរ​ភាគខាងជើង​របស់រុស្ស៊ី បានប្រកាស​កាលពីល្ងាចថ្ងៃទី២៦ ខែកុម្ភៈថា មិនបានចូលរួម​ហ្វឹកហាត់​ហោះល្បាត​នៅលើដែនទឹកអព្យាក្រឹត្យ​របស់ប្រទេសន័រវែស និងសមុទ្រ​បារ៉ែន​នោះឡើយ ។

ប្រភព​បានពន្យល់ថា យន្តហោះ​ចម្បាំង​ប្រឆាំងនាវាមុជទឹក​រយៈចម្ងាយឆ្ងាយ​(ASW)​ Tu-142 របស់រុស្ស៊ីចំនួន​២គ្រឿង​បានប្រតិបត្តិការ​ហោះហើរ​នៅលើផ្លូវមួយ​ពីលើដែនសមុទ្រ​ក្នុងបេសកកម្មមួយ​ដែល​ចំណាយពេលជាង​១២ម៉ោង ។

សេចក្តីថ្លែងការណ៍​របស់កងនាវាចរភាគខាងជើង​របស់រុស្ស៊ី​បានបញ្ជាក់​ថា «អាកាសយានិក​បានហោះហើរ​យន្តហោះ​ដោយ​សេរី​នៅលើលំហរអាកាស ហើយមិនមានទាក់ទង​ជាមួយ​ជំនួយ​នាវាចរ​​មូលដ្ឋាន​នៅលើដីនោះឡើយ» ។ បេសកកម្ម​ធ្វើឡើង​ស្រប​ទៅតាមច្បាប់​​ស្តីអំពីការប្រើប្រាស់​ដែនអាកាសអន្តរជាតិ​យ៉ាងហ្មឹងម៉ាត់ ។​

ថ្លែងការណ៍​របស់កងនាវាចរ​ភាគខាងជើង​របស់រុស្ស៊ី​បែបនេះ​បានកើតឡើង បន្ទាប់ពី​យោធា​អង់គ្លេស​បានបញ្ជាក់ថា ខ្លួនចាប់បាន​យន្តហោះ​មិនស្គាល់អត្តសញ្ញាណ​​​ចូល​ទៅកៀក​មកដែនអាកាសរបស់អង់គ្លេស​។

អ្នកនាំពាក្យក្រសួងការពារជាតិអង់គ្លេស​បញ្ជាក់ថា «យន្តហោះមិនស្គាល់អត្តសញ្ញាណទាំងនោះ​នៅខាងក្រៅ​ដែនសមុទ្រអត្ថប្រយោជន៍​របស់យើង ហើយមិនមានការហោះស្ទាក់​កើតឡើងទេ»។

សារព័ត៌មាន Daily Star បានដកស្រង់ប្រភពពីមន្ត្រី​យោធា​អង់គ្លេស​បញ្ជាក់ថា យន្តហោះ​នោះសង្ស័យថា ជារបស់រុស្ស៊ី ដោយបន្ថែមថា តាមរបាយការណ៍​គឺ​ជាយន្តហោះ​ទម្លាក់គ្រាប់បែក Tu-95 ៕


ចែករំលែក៖