សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីជាបុគ្គលិកធនាគារ MB bankម្នាក់ជិះម៉ូតូ១គ្រឿង រអិលដួលចូលកង់អ៊ិចស្នាវ៉ាទ័រ បែកក្បាលស្លាប់ភ្លាមៗនៅកន្លែងកើតហេតុ ហើយអ្នកបើកបរបង្កត្រូវបានឃាត់ខ្លួន ។
ហេតុការណ៍គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៧និង៣០នាទីព្រឹក ថ្ងៃទី២៧ ខែកុម្ភៈ ឆ្នាំ២០២០ នៅចំណុចមុខផ្សារងិនអាន ហៅផ្សារទំនប់ ស្ថិតតាមបណ្តោយ ផ្លូវ លេខ៥៩៨ភូមិ ពោងពាយ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ ។
សមត្ថកិច្ចបញ្ជាក់ថា នារីរងគ្រោះឈ្មោះ សុិន សុនវត្តី អាយុ៣២ឆ្នាំ មុខរបរបុគ្គលិកធនាគារ MB bank ស្នាក់នៅផ្លូវ៥៩៨ ភូមិពោងពាយ សង្កាត់ទួលសង្កែ២ ខណ្ឌឫស្សីកែវ ភ្នំពេញជិះម៉ូតូម៉ាក់ឃ្លីកពណ៌ស ពាក់ស្លាក់លេខ ភ្នំពេញ 1AF 6599 ។ ចំណែកអ្នកបើកបរអ៊ិចស្កា ឈ្មោះ ឆេង វាសនា ភេទប្រុស អាយុ២៧ឆ្នាំ មុខរបរបើកអ៊ិចស្កាវ៉ាទ័រ ស្នាក់នៅភូមិទូលចាន់ឃុំសំរោង ស្រុកសំរោងខេត្តតាកែវបើកអ៊ិចស្កាវ៉ាទ័រម៉ាក់ ហីយ៉ាន់ដាយ ពណ៌លឿង ពុំមានស្លាក់លខ ។
តាមប្រភពព័ត៌មានឲ្យដឹងថា នៅមុនពេលកើតហេតុ ម៉ូតូ និង អ៊ិចស្កាបាន ធ្វើដំណើរស្របទិសគ្នាពីជើងទៅត្បូង លុះដល់មកចំណុចកើតហេតុ ស្ត្រីរងគ្រោះជិះម៉ូតូខាងលើម្នាក់ឯងឡើងចិញ្ចើមផ្លូវដោយមានទឹកសើមៗ ក៏រអិលដួលចូលក្រោមកង់មុខអ៊ិចស្កាវ៉ាទ័រ កិនបណ្ដាលឲ្យបែកក្បាលស្លាប់ភ្លាមៗតែម្ដង ។
ក្រោយពេលកើតហេតុសមត្ថកិច្ចមូលដ្ឋានបានទៅដល់កន្លែងកើតហេតុ និងទាក់ទងជំនាញវាស់វែងករថយន្តអ៊ិចស្កាវ៉ាទ័រ និងអ្នកបើកបរ និងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោករាជធានីដើម្បីចាត់ការតាមនីតិវិធី រីឯសពនារីរងគ្រោះប្រគល់ជូនសាច់ញាតិយកទៅធ្វើបុណ្យតាមប្រពៃណី ៕ អរុណរះ
