សង្ស័យបែកថ្នាំទាញកាំបិតដេញកាប់គេកាប់ឯងផ្អើលពេញភូមិ

 កំពង់ស្ពឺ  ៖ ជនសង្ស័យម្នាក់ត្រូវបានសមត្ថកិច្ចធ្វើការឃាត់ខ្លួនបន្ទាប់ពីធ្វើសកម្មភាពយកកាំបិតដេញកាប់គេកាប់ឯងផ្អើលពេញភូមិ។ក្រោយឃាត់ខ្លួនទើបដឹងថាជនបង្កគឺជាមនុស្សញៀនថ្នាំ(បែកថ្នាំ)ត្រូវបានសមត្ថកិច្ចកសាងសំណុំរឿងបញ្ជូនទៅកាន់ការិយាល័យជំនាញចាត់ការតាមផ្លូវច្បាប់។

ហេតុការណ៍ដេញកាប់ប្រហារទៅលើអ្នកដ៏ទៃពីសំណាក់ជនបែកថ្នាំកើតឡើងកាលពីរសៀលថ្ងៃទី0 2 ខែមីនា 2020 នៅចំណុចភូមិច្រាមត្បូងឃុំព្រះនិព្វានស្រុកគងពិសីខេត្តកំពង់ស្ពឺជនសង្ស័យមានឈ្មោះធ្លកចេកហៅទីបុរសអាយុ 25 ឆ្នាំរស់នៅកន្លែងកើតហេតុខាងលើ។ចំណែកជនរងគ្រោះ 2 នាក់ដែលរងនូវការកាប់ប្រហារនឹងឈ្មោះ អំ សំអុលភេទប្រុសអាយុ 48 ឆ្នាំរស់នៅភូមិដុតកំបោឃុំព្រះនិព្វានស្រុកគងពិសីនិងឈ្មោះឌឿនឌីរីភេទប្រុសអាយុ 45 ឆ្នាំរស់នៅភូមិវាលថ្លាន់សង្កាត់គងនយខណ្ឌដង្កោរាជធានីភ្នំពេញ។

ប្រភពបានឱ្យដឹងថាមុនពេលកើតហេតុជនរងគ្រោះទាំងពីរនាក់កំពុងជុំគ្នាពិភាក្សារឿងការងាររកស៊ីស្រាប់តែលេចឈ្មោះធ្លកចេកបានយកកាំបិតផ្គាក់ដេញកាប់ទៅលើជនរងគ្រោះទាំង 2 បណ្ដាលឱ្យឈ្មោះអ៊ុំសំអុលត្រូវជនសង្ស័យកាប់ចំគូទខាងស្ដាំក្រោយមកជនសង្ស័យក៏បន្តទៅដេញកាប់ឈ្មោះឌឿនឌីរីបណ្ដាលឲ្យរងរបួសក្រោមត្រចៀកខាងស្ដាំជាដំណំផងដែរ។

ប្រភពបន្តថាក្រោយបង្កប្រជាពលរដ្ធបានរាយការណ៍ទៅសមត្ថកិច្ចឱ្យចុះមកឃាត់ខ្លួនជនសង្ស័យដើម្បីចាត់ការតាមនីតិវិធីច្បាប់។សមត្ថកិច្ចបានបញ្ជាក់ថាក្រោយធ្វើការឃាត់ខ្លួនជនសង្ស័យបានហើយទើបដឹងថាជនសង្ស័យរូបនេះជាមនុស្សញៀនថ្នាំបែកថ្នាំរហូតលែងដឹងអីទើបបង្កជាអំពើហិង្សាទៅលើអ្នកដ៏ទៃបែបនេះទោះជាយ៉ាងណាជនសង្ស័យត្រូវបានសមត្ថកិច្ចបញ្ជូនទៅកាន់អធិការដ្ឋាននគរបាលស្រុកគងពិសីដើម្បីចាត់ការបន្តតាមនីតិវិធី៕សេនាស័ក្តិ