នគរបាលក្រុងកំពង់ចាមប្រកាសសួររកក្រុមគ្រួសារសពស្លាប់នៅលើស្ពានគីហ្សូណាដោយគ្រោះថ្នាក់ចរាចរណ៍

ខេត្តកំពង់ចាម: នគរបាលក្រុងកំពង់ចាម បានប្រកាសស្វែងរកក្រុមគ្រួសារសពបុរសមិនស្គាល់អត្តសញ្ញាណម្នាក់ ដែលមានភិនភាគដូចរូប ដែលបានជួបគ្រោះថ្នាក់ចរាចរណ៌ ស្លាប់បាត់បង់ជីវិត កាលពីថ្ងៃទី០៣ ខែមីនា ឆ្នាំ២០២០ វេលាម៉ោង ១០ និង៤០នាទីយប់ នៅចំណុចលើស្ពានគីហ្ស៊ូណា ស្ថិតក្នុងភូមិទី៣ សង្កាត់កំពង់ចាម ក្រុងកំពង់ចាម ខេត្តកំពង់ចាម ។

នគរបាលក្រុងកំពង់ចាម បង្ហាញថា សាកសព ភេទប្រុស អាយុប្រហែលជាង២០ឆ្នាំ សប្បុរសណ្តែកបាយ កម្ពស់១.៧០ម៉ែត្រ ស្លៀកខោខូវប៊យ ពណ៌ខៀវ ពាក់អាវយឺតដៃខ្លី ពណ៌ខ្មៅ ជិះម៉ូតូ Honda Dream C១២៥ ពណ៌ខ្មៅ ពាក់ស្លាកលេខ ព្រៃវែង 2N-8984 ហើយត្រូវសមត្ថកិច្ចនគរបាលចរាចរក្រុងកំពង់ចាមយកទៅតម្កល់ទុក នៅសាលតម្កល់សពមន្ទីរពេទ្យខេត្តកំពង់ចាម។  មកដល់រសៀលថ្ងៃទី០៤ ខែមីនានេះ សពជនរងគ្រោះម្នាក់នេះ មិនទាន់រកឃើញសាច់ញាតិនោះទេ។ ហេតុនេះ បើបងប្អូនណាបាត់សមាជិកដូចមានភិនភាគខាងលើនេះសូមទំនាក់ទំនងនៅអធិការដ្ឋាននគរបាលក្រុងកំពង់ចាម ឬបើបងប្អូនណាបានដឹង ឬស្គាល់ សូមជួយផ្ដល់ដំណឹងដល់គ្រួសារជនរងគ្រោះផង ដើម្បីឲ្យគ្រួសារមកយកសព ទៅធ្វើបុណ្យតាមប្រពៃណី ៕ សហការី