រថយន្តបុកជាមួយម៉ូតូបណ្ដាលឲ្យបុរស០១ស្លាប់នៅស្រុកពញាឮ

កណ្ដាល ៖  បុរសម្នាក់បើកម៉ូតូបុកជាមួយរថយន្ថពេញមួយទំហឹង បណ្ដាលឲ្យស្លាប់ក្នុងថ្លុកឈាមយ៉ាងអណោចអធ័ម នៅវេលាម៉ោង១៦និង០៥នាទី ថ្ងៃទី៦ ខែមីនា ឆ្នាំ២០២០
ស្ថិតក្នុងភូមិទួលងោគ ឃុំកំពង់លួង  ស្រុកពញាឮ ខេត្តកណ្តាល ។
មន្ត្រីនគរបាលចរាចរណ៍ស្រុកពញាឮបានឲ្យដឹងថា ជនរងគ្រោះស្លាប់ឈ្មោះ រិន សារី ភេទប្រុស អាយុ៤២ឆ្នាំ មានទីលំនៅភូមិផ្តៅជុំលិច  ឃុំផ្តៅជុំ ស្រុកជើងព្រៃ ខេត្តកំពង់ចាម បើកបរម៉ូតូម៉ាកHONDA DREAM ធុន​C125 ពណ៌ខ្មៅ ពាក់ស្លាកលេខភ្នំពេញ​1AS-8869 ។ ចំណែករថយន្តម៉ាកកូរ៉េ ប្រភេទដឹកទំនិញ ធុនតូចមួយគ្រឿងទៀត​ បើកបរដោយជនមិនស្គាល់អត្តសញ្ញាណ ។
ប្រភពដដែលបន្តថា នៅមុនពេលកើតហេតុ សាក្សីបានឃើញជនរងគ្រោះជិះម៉ូតូក្នុងទិសដៅពីជើងទៅត្បូង លុះបើកមកដល់ចំណុចកើតហេតុខាងលើ បានប៉ះជាមួយរថយន្តកូរ៉េ ប្រភេទដឹកទំនិញធុនតូចមួយគ្រឿង បណ្ដាលឲ្យម៉ូតូដួលបោកទៅនឹងផ្លូវស្លាប់ភ្លាមៗនៅកន្លែងកើតហេតុតែម្ដង ។ ចំណែកឯរថយន្តបានបើករត់គេចបាត់ស្រមោល ។
ក្រោយពីមានហេតុការណ៍កើតឡើង កំលាំងជំនាញបានចុះដល់កន្លែងកើតហេតុ រួចធ្វើការ ត្រួតពិនិត្យ និងវាស់វែង រួចកសាងឯកសារដកហូតយកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ។ ដោយឡែកសាកសពជនរងគ្រោះ ត្រូវបានសមត្ថកិច្ចប្រគល់សពអោយទៅសាច់ញ្ញាតិយកទៅធ្វើបុណ្យតាមប្រពៃណី។ដោយ៖ស្អាងជ័យ