សារព័ត៌មាន នគរវត្ត តែងតែនាំមុខគេជានិច្ច
បច្ចុប្បន្ន អឺរ៉ុប បានក្លាយទៅជា «សម្បុក» កូវីដ-១៩ ក្រោយពេលដែលចិនបានបំផ្លាញ សម្បុកកូវីដ-១៩ នៅទីក្រុងវូហានដោយជោគជ័យ។ ចិនមានអ្នកឆ្លងនិងស្លាប់ធាក់ចុះទាបបំផុត ហើយ នៅចុងខែមីនានេះ និងមិនមានអ្នកឆ្លងទៀតឡើយ។ ប្រទេសនៅក្នុងតំបន់អឺរ៉ុប ដើម្បីទប់ស្កាត់ការឆ្លងរាលដាលកាន់តែខ្លាំង ប្រទេសនៅតំបន់អឺរ៉ុប បានសម្រេច បិទសាលារៀន។
កន្លងមក មានប្រទេសអេស្បាញ អ៊ីតាលី បានសម្រេចបិទសាលារៀន ដោយខ្លាចការឆ្លងរាលដាលដល់សិស្ស ពិបាកក្នុងការទប់ស្កាត់។ នៅពេលនេះដែរបារាំងក៏បានប្រកាសបិទទ្វារសាលារៀនផងដែរ។
កាលពីយប់ថ្ងៃទី១២ខែមីនា ប្រធានាធិបតីបារាំង លោក ម៉ាក្រុងបានប្រកាសថា បារាំងនឹងបិទទ្វាសាលារៀនទាំងអស់ ចាប់ពីថ្ងៃទី១៦ខែមីនា ដើម្បីទប់ស្កាត់ការឆ្លងរាលដាលនៃវីរុសផ្លូវដង្ហើម Covid-19 ។
ប្រធានាធិបតីបារាំងបានបញ្ជាក់ថា Covid-19 បានប៉ះពាល់យ៉ាងខ្លាំង ដល់ទ្វីបអឺរ៉ុប ដោយរាលដាលនៅគ្រប់ប្រទេសទាំងអស់ បង្កឲ្យមានវិបត្តិផ្នែកសុខភាពយ៉ាងធ្ងន់បំផុតមិនធ្លាប់មាន ដល់ប្រទេសបារាំងនិងប្រទេសទាំងអស់ក្នុងតំបន់។ នៅក្នុងប្រទេសបារាំង រយៈពេល២ថ្ងៃចុងក្រោយនេះមានករណីឆ្លងវីរុសដល់ទៅជាង១ពាន់នាក់ និងមានសញ្ញាឆ្លងរាលដាលកាន់តែច្រើនថែមទៀត ។
ប្រធានាធិបតីបារាំង បានបញ្ជាក់ទៀតថា Covid-19 បានឆ្លងរាលដាលយ៉ាឆាប់រហ័សដូច្នេះការផ្តល់អាទិភាពការពារសុខភាពពលរដ្ឋគឺជារឿងសំខាន់បំផុត។ ដូច្នេះចាប់ពីថ្ងៃទី១៦ សប្តាហ៍ក្រោយ សាលាទាំងអស់នៅបារាំង ត្រូវបិទទ្វារ ការពារឆ្លងរាលដាល ក៏ដូចជាបញ្ចប់ក្តីបារម្ភ របស់អាណាព្យាបាលសិស្ស។ តាមក្រុមអ្នកវិទ្យាសាស្ត្រ កុមារនិង សិស្សសាលាអាចចម្លងជំងឺលឿនបំផុត។
បច្ចុប្បន្នបារាំងមានករណីឆ្លងវីរុសCovid-19 កើនឡើងដល់ទៅ២៨៧៦នាក់ហើយ និងមានអ្នកស្លាប់៦១នាក់។ ចំណែកអ្នកព្យាបាលជាសះស្បើយវិញ មានតែ១២នាក់ប៉ុណ្ណោះ។ បារាំងជាប្រទេសដែលមានវិស័យសុខាភិបាលរីកចំរើន ប៉ុន្តែក៏មិនអាចទប់ស្កាត់ ការឆ្លងរាលដាលនិងព្យាបានអ្នកជំងឺបានល្អនោះឡើយ៕
