ជនជាតិណ័រវេ ម្នាក់ ដើរសុំលុយតាមទីសាធារណៈ ត្រូវសមត្ថកិច្ចឃាត់ខ្លួន

ភ្នំពេញ៖ បុរសជនជាតិណ័រវេម្នាក់ ដើរសុំលុយប្រជាពលរដ្ឋតាមទីសាធារណៈ ធ្វើឲ្យបាត់បង់សណ្ដាប់ធ្នាប់ ត្រូវបានកម្លាំងនគរបាលនាយកដ្ឋានទេសចរណ៍នាំខ្លួនយកមកសាកសួរ ទើបដឹងថាគ្មានលិខិតឆ្លងដែន ។

 លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និងអនុវត្តនីតិវិធី រាជធានីភ្នំពេញ បានឲ្យដឹងថា ជនបរទេសនោះឈ្មោះ THOMAS WILIAM KRISTIANSEN ភេទប្រុស អាយុ៣៣ឆ្នាំ ជនជាតិណ័រវេ ទីកន្លែងស្នាក់នៅមិនពិតប្រាកដ ដើរដេកតាមទីសាធារណៈ ។

លោកនាយការិយាល័យបន្តថា នៅព្រឹកថ្ងៃទី១២ ខែមីនា ឆ្នាំ២០២០ កម្លាំងការិយាល័យស៊ើបអង្កេត និងអនុវត្តនីតិវិធី ផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ បានទទួលជនបរទេសម្នាក់ ពីកម្លាំងនាយកដ្ឋានទេសចរណ៍ ពីបទគ្មានលិខិតឆ្លងដែនជាប់នឹងខ្លួន និងដើរសុំលុយតាមទីសាធារណៈ ធ្វើអោយបាត់បង់សណ្ដាប់ធ្នាប់។

បច្ចុប្បន្នកម្លាំងការិយាល័យកំពុងសាកសួរ និងអនុវត្តនីតិវិធីបន្ត ៕ស រស្មី